spot_img
Friday, November 20, 2026
Home Blog Page 28

മഴ കനക്കുന്നു; തിരുവനന്തപുരത്തും കൊല്ലത്തും അടക്കം വെള്ളക്കെട്ട് രൂക്ഷം, 10 ജില്ലകളിൽ ഇന്ന് യെല്ലോ അലേര്‍ട്ട്.

0

തിരുവനന്തപുരം: തുലാവര്‍ഷം ശക്തമായതോടെ സംസ്ഥാനത്ത് ലഭിക്കുന്നത് വ്യാപക മഴ. ഇന്ന് തിരുവനന്തപുരം മുതല്‍ മലപ്പുറം വരെയുള്ള പത്ത് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. അടുത്ത അഞ്ച് ദിവസവും സംസ്ഥാനത്ത് വ്യാപക മഴ തുടരുമെന്നാണ് മുന്നറിയിപ്പ്. ഇന്നലെ രാത്രിയോടെ തെക്കന്‍ ജില്ലകളിലും മധ്യകേരളത്തിലും ശക്തമായ മഴയാണ് ലഭിച്ചത്. തിരുവനന്തപുരത്തും കൊല്ലത്തും അടക്കം വെള്ളക്കെട്ട് രൂക്ഷമായി.തിരുവനന്തപുരത്ത് മലയോര, തീരദേശ മേഖലകളില്‍ പലയിടത്തും വീടുകളില്‍ വെള്ളം കയറി. നദികളിലെ ജലനിരപ്പ് ഉയര്‍ന്നിട്ടുണ്ട്. മക്കി, മരുതാമല, പേപ്പാറ, ആനപ്പാറ തുടങ്ങിയ ഇടങ്ങളില്‍ ജാഗ്രതാ നിര്‍ദേശം നല്‍കിയിട്ടുണ്ട്. കൊല്ലത്ത് കനത്ത മഴയില്‍ പലയിടത്തും വെള്ളക്കെട്ട് രൂക്ഷമാണ്. ചാത്തന്നൂരില്‍ സര്‍വീസ് റോഡില്‍ വെള്ളം കയറി കാര്‍ പകുതിയോളം മുങ്ങി. വ്യാപാര സ്ഥാപനങ്ങളിലും വെള്ളം കയറി. ദേശീയപാത 66 ലും കരുനാഗപ്പള്ളി, കുണ്ടറ മേഖലകളിലും വെള്ളക്കെട്ട് രൂക്ഷമാണ്. അതേസമയം, ഏഴുകോണില്‍ ഇടിമിന്നലേറ്റ് യുവാവിന് പൊള്ളലേറ്റു. ഇടിമിന്നലില്‍ വീടുകളിലെ ഉപകരണങ്ങള്‍ക്കുള്‍പ്പെടെ കേടുപാടുകളും സംഭവിച്ചിട്ടുണ്ട്.അടുത്ത അഞ്ച് ദിവസവും മഴ തുടരുമെന്ന മുന്നറിയിപ്പിനൊപ്പം മലയോര മേഖലകളില്‍ ജാഗ്രതാ നിര്‍ദേശവും നല്‍കിയിട്ടുണ്ട്. മഴയുടെ പശ്ചാത്തലത്തില്‍ നാളെ എറണാകുളം, ഇടുക്കി, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍ ജില്ലകളില്‍ യെല്ലോ അലേര്‍ട്ട് പ്രഖ്യാപിച്ചിട്ടുണ്ട്. ഇടിമിന്നലോടുകൂടിയ മഴയ്ക്കും മണിക്കൂറില്‍ 40 കിലോമീറ്റര്‍ വരെ വേഗത്തില്‍ കാറ്റ് വീശാനും സാധ്യതയുണ്ടെന്നാണ് അറിയിപ്പ്.തെക്കുപടിഞ്ഞാറന്‍ ബംഗാള്‍ ഉള്‍ക്കടലിലും തായ്ലന്‍ഡ് കടലിടുക്കിലും ചക്രവാതച്ചുഴികള്‍ നിലനില്‍ക്കുന്നുണ്ട്. അടുത്ത 24 മണിക്കൂറിനുള്ളില്‍ ബംഗാള്‍ ഉള്‍ക്കടലില്‍ പുതിയ ന്യൂനമര്‍ദ്ദം രൂപപ്പെടാനും സാധ്യതയുണ്ട്. ഇതിന്റെ സ്വാധീനമാണ് സംസ്ഥാനത്ത് മഴ ശക്തമാകാന്‍ കാരണം.

കോഴിക്കോട് മാങ്കാവിൽ ടർഫിൽ കളിക്കുന്നതിനിടെ പ്ലസ് ടു വിദ്യാർഥി കുഴഞ്ഞുവീണ് മരിച്ചു.

0

കോഴിക്കോട്: മാങ്കാവിൽ ടർഫിൽ കളിക്കുന്നതിനിടെ പ്ലസ് ടു വിദ്യാർഥി കുഴഞ്ഞുവീണ് മരിച്ചു. പയ്യാനക്കൽ സ്വദേശി മുഹാദ് (18) ആണ് മരിച്ചത്. വൈകിട്ട് മാങ്കാവിലെ ടർഫിൽ കളിക്കുന്നതിനിടെ ദേഹാസ്വാസ്ഥ്യം അനുഭവപ്പെട്ട് കുഴഞ്ഞുവീഴുകയായിരുന്നു.വലിയതോടി പറമ്പിൽ ബഷീറിന്റെ മകനാണ്. കോഴിക്കോട് ക്രിസ്ത്യൻ കോളജ് ഹയർ സെക്കൻഡറി സ്കൂളിലെ പ്ലസ് ടു വിദ്യാർഥിയാണ്.

ആദ്യാക്ഷരം കുറിച്ച് കുരുന്നുകൾ, സംസ്ഥാനത്ത് വിദ്യാരംഭച്ചടങ്ങുകൾ.

0

തിരുവനന്തപുരം: വിജയദശമി ദിനത്തിൽ കുരുന്നുകളെ വിദ്യയുടെ ലോകത്തേക്കു കൈപിടിച്ച് സംസ്ഥാനത്ത് വിദ്യാരംഭത്തിന് തുടക്കം. അക്ഷരപൂജയിലൂടെ അറിവിനെയും ആയുധപൂജയിലൂടെ ജോലിയെയും കലയേയും ഉപാസാക്കുന്ന ദിനം വിജയദശമി. അറിവിൻ്റെയും വിദ്യയുടെയും ലോകത്തേക്ക് കുരുന്നുകൾ പ്രവേശിക്കുന്ന ദിനം. ക്ഷേത്രങ്ങളിലും വിവിധ സാംസ്ക്കാരിക കേന്ദ്രങ്ങളിലുമാണ് വിദ്യാരംഭചടങ്ങുകൾ നടക്കുന്നത്. കൊല്ലൂർ മൂകാംബിക ക്ഷേത്രത്തിൽ വൻ തിരക്കാണ്. മലയാളികളാണ് കൂടുതലായി ഇവിടെ എത്തുന്നത്.‌തിരൂർ തുഞ്ചൻ പറമ്പിൽ രാവിലെ അഞ്ചര മണി മുതൽ വിദ്യാരംഭചടങ്ങുകൾ തുടങ്ങി. ദക്ഷിണമൂകാംബിക എന്നറിയപ്പെടുന്ന കോട്ടയം‌ പനച്ചിക്കാട് ക്ഷേത്രത്തിൽ പുലർച്ചെ നാല് മണി മുതൽ വിദ്യാരംഭം തുടങ്ങി. ​ഗുരുക്കൻമാർ ആദ്യക്ഷരം കുറിച്ചു. തിരുവനന്തപുരത്ത് പൂജപ്പുര സരസ്വതി മണ്ഡപത്തിലും പത്മനാഭക്ഷേത്രത്തിന് മുന്നിലെ സരസ്വതി മണ്ഡപത്തിലും ആദ്യക്ഷരം കുറിക്കാൻ വൻ തിരക്കാണ്. പൂജപ്പുരയിൽ ചാണ്ടി ഉമ്മൻ എംഎൽഎ അതിരാവിലെ കുട്ടികളെ എഴുത്തിനിരുത്തി. മറ്റ് പ്രമുഖരും ഇവിടെ എത്തും. വൈലോപ്പിള്ളി സംസ്കൃതി ഭവൻ, ഐരാണിമുട്ടം തുഞ്ചൻ സ്മാരകം എന്നിവടങ്ങളിലും തിരക്കാണ്. മുഖ്യമന്ത്രി വി ഡി സതീശൻ പറവൂറിലെ ഓഫീസിൽ കുരുന്നുകളെ ആദ്യക്ഷരം കുറിക്കും.

ട്രെയിൻ പാളം തെറ്റിക്കാൻ ശ്രമം; പാലക്കാട് ബീഹാർ സ്വദേശി പിടിയിൽ.

0

പാലക്കാട്: ഷൊർണൂർ റെയിൽവേ ട്രാക്കിൽ ഭാരമുള്ള വസ്തുക്കൾ വച്ച് ട്രെയിൻ പാളം തെറ്റിക്കാൻ ശ്രമം. സംഭവത്തിൽ ബീഹാർ സ്വദേശിയായ ഷുക് ലാൽ മറിയയാണ് പിടിയിലായത്. ഒറ്റപ്പാലം – ഷൊർണൂർ റെയിൽവേ സ്റ്റേഷനുകൾക്കിടയിൽ ഉള്ള മൂന്നിടങ്ങളിലാണ് ഇത്തരത്തിൽ ഭാരം ഉള്ള വസ്തുക്കൾ ട്രാക്കിൽ കണ്ടെത്തിയത്. മാന്നനൂർ, കാരക്കാട് എ -കാബിൻ പരിസരം, ഇതുകൂടാതെ മറ്റൊരു ഇടത്തും ഇത്തരത്തിൽ ട്രാക്കിൽ ഭാരമുള്ള വസ്തുക്കൾ കണ്ടെത്തുകയായിരുന്നു. ഇന്ന് രാവിലെ പത്തരയ്ക്കും 11 30 നും ഇടയിലുള്ള സമയത്തായിരുന്നു സംഭവം.കോൺക്രീറ്റ് സ്ലാബും , റെയിൽ കഷ്ണവും, ഒരു ചാക്കിൽ കട്ടപിടിച്ച സിമന്റും കണ്ടെത്തിയ സംഭവസ്ഥലത്തു നിന്നും കസ്റ്റഡിയിലെടുത്ത യുവാവിനെ ചോദ്യം ചെയ്തുവരികയാണ്. ആർപിഎഫ് സംഘമാണ് യുവാവിനെ കസ്റ്റഡിയിലെടുത്തത്.

പിതാവിൻ്റെ മർദ്ദനമേറ്റ് മകൻ മരിച്ചു

0

മീഞ്ചന്ത:പിതാവിൻ്റെ മർദ്ദനമേറ്റ് മകൻ മരിച്ചു. മീഞ്ചന്ത ബേപ്പൂർ റോഡിൽ റെയിൽവേ ഗേറ്റിന് സമീപം താമസിക്കുന്ന മിസ്ഹാബ് (31)ആണ് മരിച്ചത്.ഇന്ന് രാവിലെയാണ് നാടിനെ നടുക്കിയ സംഭവമുണ്ടായത്.സ്ഥിരമായി ലഹരി ഉപയോഗിക്കുകയുംനാട്ടുകാരുമായും വീട്ടുകാരുമായും നിരന്തരം പ്രശ്നങ്ങൾ ഉണ്ടാക്കുന്ന ആളാണ് മിസ് ഹാബ് എന്നാണ് പുറത്തുവരുന്ന വിവരം.ഇന്ന് രാവിലെയും . പതിവുപോലെ വീട്ടിൽ വന്ന് ബഹളമുണ്ടാക്കുകയും തുടർന്ന് പിതാവായ ഉമ്മർ കോയയുമായി വാക്ക് തർക്കവും പിന്നീട് ഇത് കയ്യാങ്കളിയിലേക്ക് മാറുകയും ചെയ്തു. കയ്യാങ്കളിക്കിടെ മർദ്ദനമേറ്റ് നിലത്ത് വീണ മിസ്ഹാബിനെ ഉടൻതന്നെസഹോദരങ്ങൾ ചേർന്ന് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.മകൻ്റെ മർദ്ദനത്തിൽ പിതാവ് ഉമ്മർകോയക്കും പരിക്കേറ്റിട്ടുണ്ട്. പരിക്കേറ്റ ഉമ്മർകോയയെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.ഏറെക്കാലമായി മിസ്ഹാബ് ലഹരി ഉപയോഗിച്ച ശേഷം നിരന്തരം പ്രശ്നങ്ങൾ ഉണ്ടാക്കിയിരുന്നുവെന്നാണ് നാട്ടുകാർ പറയുന്നത്. പന്നിയങ്കര പോലീസ് സ്ഥലത്തെത്തി തുടർനടപടികൾ സ്വീകരിച്ചു.

സംസ്ഥാനത്തെ ബാറുകളുടെ പ്രവർത്തനസമയം രണ്ട് മണിക്കൂർ കുറയ്ക്കും.

0

സംസ്ഥാനത്തെ ബാറുകളുടെ പ്രവർത്തന സമയം രണ്ട് മണിക്കൂർ കുറയ്ക്കുന്നതടക്കമുള്ള നിർദേശങ്ങളുമായി എക്സൈസ് വകുപ്പിന്റെ പുതിയ മദ്യനയ കരട്. വീര്യം കുറഞ്ഞ മദ്യത്തിന്റെ വിൽപനയ്ക്കുള്ള നിർദേശങ്ങൾ ഒഴിവാക്കുക, ബാർ ലൈസൻസ് ഫീസ് 20 ശതമാനം വർധിപ്പിക്കുക, അധിക ഫീസ് നൽകി പുലർച്ചെ വരെ ബാറുകൾ പ്രവർത്തിക്കാൻ അനുവദിക്കുന്ന വ്യവസ്ഥ ഒഴിവാക്കുക തുടങ്ങിയ നിർദേശങ്ങളും കരടിലുണ്ട്. നിലവിൽ രാവിലെ 10 മുതൽ രാത്രി 12 വരെയാണ് ബാറുകളുടെ പ്രവർത്തന സമയം. ഇത് രാവിലെ 11 മുതൽ രാത്രി 11 വരെയാക്കി പുനഃക്രമീകരിക്കാനാണ് നിർദേശം. ബാർ ലൈസൻസ് അനുവദിക്കുന്ന വിഭാഗങ്ങളിലും മാറ്റം വരുത്താൻ കരട് ശുപാർശ ചെയ്യുന്നു. വീര്യം കുറഞ്ഞ മദ്യത്തിന്റെ നികുതി ഘടന നിശ്ചയിച്ചിട്ടുണ്ടെങ്കിലും അതിന്റെ വിൽപന അനുവദിക്കേണ്ടതില്ലെന്നാണ് എക്സൈസ് വകുപ്പിന്റെ നിലപാട്. 15 ശതമാനം വരെ വീര്യമുള്ള ഹോർട്ടി വൈൻ ബേക്കറികളിലൂടെ വിൽക്കാമെന്ന എൽഡിഎഫ് സർക്കാരിന്റെ നിർദേശവും പുതിയ കരടിൽ ഒഴിവാക്കും. മദ്യം വാങ്ങാൻ എത്തുന്നവരുടെ പ്രായം 23 വയസ് പിന്നിട്ടെന്ന് ഉറപ്പാക്കാതെ മദ്യം വിതരണം ചെയ്താൽ ബാർ ലൈസൻസികൾക്കും ബവ്കോ ജീവനക്കാർക്കും എതിരെ കർശന നടപടി സ്വീകരിക്കണമെന്നും കരട് നിർദേശിക്കുന്നു. എലപ്പുള്ളിയിൽ എൽഡിഎഫ് സർക്കാർ അനുമതി നൽകിയ സ്വകാര്യ മദ്യനിർമാണ പ്ലാന്റിന്റെ അനുമതി റദ്ദാക്കാനും ശുപാർശയുണ്ട്.മേനോൻ പാറയിൽ നിന്ന് വിപണിയിലെത്തിക്കാൻ ലക്ഷ്യമിട്ട മിന്നൽ മാജിക് ബ്രാൻഡിയുടെ ഉൽപാദനം വിദഗ്ധ സമിതിയുടെ പരിശോധനയ്ക്കുശേഷം മാത്രമേ ആരംഭിക്കൂവെന്നും കരടിൽ വ്യക്തമാക്കുന്നു.എക്സൈസ് മന്ത്രി എം. ലിജു മദ്യവിരുദ്ധ സംഘടനകൾ, ജനപ്രതിനിധികൾ, മുൻ എക്സൈസ് മന്ത്രിമാർ എന്നിവരുമായി നടത്തിയ ആശയ വിനിമയത്തിന്റെ അടിസ്ഥാനത്തിലാണ് കരട് തയ്യാറാക്കിയത് എന്നാണ് വിവരം. മന്ത്രിസഭാ ഉപസമിതി കരട് ചർച്ച ചെയ്ത് ഒരാഴ്ചയ്ക്കുള്ളിൽ മുഖ്യമന്ത്രിക്ക് സമർപ്പിക്കും. തുടർന്ന് യുഡിഎഫിൽ ചർച്ച നടത്തിയശേഷം നവംബർ 30നകം മദ്യനയം അന്തിമമാക്കാനാണ് നീക്കം.

ചിക്കനും ബീഫും പാലും പഴവും മുട്ടയും, ഇടയക്ക് ചായയും കടികളും; 12000 ചതുരശ്ര അടിയുള്ള പാചകശാല: സ്കൂൾ‍ കായികമേളയ്ക്കു പഴയിടം രുചി.

കോഴിക്കോട്: സംസ്ഥാന സ്കൂൾ കായികമേളയിൽ കോഴിക്കോടൻ രുചിപ്പെരുമ ഒരുക്കാൻ ഇത്തവണയും പഴയിടം മോഹനൻ നമ്പൂതിരിയാണ്. ചിക്കനും ബീഫും പാലും പഴവും മുട്ടയുമടങ്ങിയ പോഷകസമൃദ്ധമായ ഭക്ഷണമാണ് കായികതാരങ്ങൾക്കുവേണ്ടി ഒരുക്കുന്നത്. ഇത്തവണ സ്കൂൾ കായികമേളയ്ക്ക് രണ്ട് അടുക്കളകളാണ് ഒരുങ്ങുന്നത്. വിദ്യാർഥികൾക്ക് മത്സരവേദിയിൽനിന്ന് ഭക്ഷണശാലയിലെത്തി ഭക്ഷണം കഴിക്കാനുള്ള ബുദ്ധിമുട്ട് ഒഴിവാക്കാൻ അതാതു മത്സരവേദികളിൽ ഭക്ഷണം എത്തിക്കും. അതാതിടത്ത് ഭക്ഷണം കഴിക്കാനുള്ള സൗകര്യവും ഒരുക്കിയിട്ടുണ്ട്.ചാത്തമംഗലം പന്ത്രണ്ടിലെ എൻഐടിയുടെ പുതിയ സ്പോർട്സ് അരീനയിലാണ് പ്രധാന അടുക്കളയും ഭക്ഷണപ്പുരയും ഒരുക്കിയിരിക്കുന്നത്. കൊടിയത്തൂർ പിടിഎം എച്ച്എസ്എസ്സിലാണ് രണ്ടാമത്തെ പാചകശാല. എൻഐടി മൈതാനത്ത് 12000 ചതുരശ്ര അടിയുള്ള പ്രധാന പാചകശാലയാണ് നിർമിക്കുന്നത്. കലവറയും പാചകപ്പുരയുമടക്കമാണ് ഇത്. ഭക്ഷണശാലയിൽ ഒരുനേരം ശരാശരി 15000 പേരെയാണ് പ്രതീക്ഷിക്കുന്നത്. പ്രഭാത ഭക്ഷണം, ഉച്ചഭക്ഷണം, രാത്രിഭക്ഷണം എന്നിങ്ങനെയാണ് ഭക്ഷണക്രമം. ഇടനേരങ്ങളിൽ സംഘാടകർക്കും റഫറിമാർക്കുമടക്കം ചായയും ചെറുകടികളും എത്തിക്കും.കായികതാരങ്ങൾക്ക് രാവിലെ ഭക്ഷണത്തിനൊപ്പം പാലും മുട്ടയും രാത്രി ഭക്ഷണത്തിനൊപ്പം കട്ട് ഫ്രൂട്സും നൽകുന്നതാണ് പതിവ്. ഇത്തവണയും ക്രമമനുസരിച്ചായിരിക്കും ഭക്ഷണം. പി.കെ.അരവിന്ദൻ അധ്യക്ഷനായുള്ള ഭക്ഷണ കമ്മിറ്റിയാണ് നേതൃത്വം നൽകുന്നത്. ആകെ 10 വേദികളിലാണ് മത്സരം. ഭക്ഷണശാലകളുള്ള എൻഐടിയും കൊടിയത്തൂർ പിടിഎമ്മുമൊഴികെയുള്ള 8 വേദികളിലേക്ക് എൻഐടിയിലെ ഭക്ഷണശാലയിൽനിന്ന് ഭക്ഷണം എത്തിക്കും. ഇതിനായി പ്രത്യേകം വാഹനങ്ങളും തയാറാക്കിയിട്ടുണ്ടെന്നും അധ്യാപകർ പറഞ്ഞു. പാചകശാലകളുടെ നിർമാണം അവസാനഘട്ടത്തിലാണ്. എൻഐടിയിടെ ഭക്ഷണശാലയിൽ തട്ടടിക്കുന്ന ജോലികളാണ് തിങ്കളാഴ്ച നടന്നത്.ഭക്ഷണശാലകളുടെ നിർമാണ പുരോഗതി വിലയിരുത്താൻ പഴയിടം മോഹനൻ നമ്പൂതിരിയും മകൻ യദു പഴയിടവും അടങ്ങുന്ന സംഘം എൻഐടി മൈതാനത്ത് എത്തി. തുടർന്ന് മെഡിക്കൽ കോളജ് ക്യാംപസ് എച്ച്എസ്എസ്സിൽ ജില്ലാ കായികമേളയുടെ ഭക്ഷണശാലയിലെത്തി ഉച്ചഭക്ഷണവും കഴിച്ചാണ് പഴയിടം മടങ്ങിയത്. രണ്ടു വർഷം മുൻപ് കോഴിക്കോട്ടുനടന്ന സംസ്ഥാന സ്കൂൾ കലോത്സവത്തിനും പഴയിടമാണ് ഭക്ഷണമൊരുക്കിയത്.

ദീർഘകാലത്തെ ആവശ്യമായ താലൂക്ക് പദവി പ്രതീക്ഷയിൽ കുന്ദമംഗലം

0

കുന്ദമംഗലം: രണ്ടു നൂറ്റാണ്ടിലധികമായി സബ് താലൂക്ക് ആയി തുടരുന്ന കേരളത്തിലെ ഏക സബ് താലൂക്കായ കുന്ദമംഗലത്തിന് താലൂക്ക് പദവി നൽകി ഉയർത്തണമെന്ന് എംഎ റസാഖ് മാസ്റ്റർ എംഎൽഎ. നിയമസഭ സമ്മേളനത്തിലാണ് എം.എ. റസാഖ് മാസ്റ്റർ സബ്മിഷനിലൂടെ ഇക്കാര്യം ആവശ്യപ്പെട്ടത്.ജില്ലയിലെ താലൂക്കുകളുടെ ജനസംഖ്യാ ബാഹുല്യവും ജോലിഭാരവും കാരണം സാധാരണക്കാർ വിവിധ ആവശ്യങ്ങൾക്കായി കിലോമീറ്ററുകൾ സഞ്ചരിച്ച് കോഴിക്കോട് താലൂക്ക് ഓഫിസിനെ ആശ്രയിക്കേണ്ടി വരുന്ന ദുരിതം എം.എൽ.എ സഭയുടെ ശ്രദ്ധയിൽപ്പെടുത്തി. ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്‌മെന്റ് (ഐ.ഐ.എം), നാഷനൽ ഇൻസ്റ്റിറ്റ്യൂട്ട് ഓഫ് ടെക്നോളജി (എൻ.ഐ.ടി), എൻ.ഐ.ഇ.എൽ.ടി, സി.ഡബ്ല്യു.ആർ.ഡി.എം, സ്കൂൾ ഓഫ് മാത്തമാറ്റിക്സ് തുടങ്ങി നിരവധി പ്രമുഖ സ്ഥാപനങ്ങൾ നിലനിൽക്കുന്ന വേഗത്തിൽ നഗരവത്കരണം നടന്നുകൊണ്ടിരിക്കുന്ന പ്രദേശമാണ് കുന്ദമംഗലം എന്ന് എം.എൽ.എ സൂചിപ്പിച്ചു.മിനി സിവിൽ സ്റ്റേഷൻ ഉൾപ്പെടെ ഒരു താലൂക്കിനാവശ്യമായ എല്ലാ അടിസ്ഥാന സൗകര്യങ്ങളും ഡെപ്യൂട്ടി തഹസിൽദാർ ഉൾപ്പെടെ എട്ട് സ്റ്റാഫുകളും കുന്ദമംഗലത്തുണ്ട്. ഇതിൽ ആറുപേരും ഡെപ്യൂട്ടേഷനിൽ വിവിധ വകുപ്പുകളിൽ ജോലി ചെയ്യുകയാണ്. ബ്രിട്ടീഷ് ഭരണകാലത്ത് 1805ൽ രൂപവത്കരിച്ച കുന്ദമംഗലം സബ് താലൂക്ക് രണ്ട് നൂറ്റാണ്ട് പിന്നിട്ടിട്ടും താലൂക്ക് പദവി ലഭിക്കാതെ കേരളത്തിൽ അവശേഷിക്കുന്ന ഏക സബ് താലൂക്കാണ് എന്ന് അദ്ദേഹം ചൂണ്ടിക്കാണിച്ചു. കോഴിക്കോട്, താമരശ്ശേരി താലൂക്കുകൾ പുനഃക്രമീകരിച്ച് 18 വില്ലേജുകൾ ഉൾപ്പെടുത്തി കുന്ദമംഗലം താലൂക്ക് രൂപവത്കരിക്കണമെന്നാണ് എം.എൽ.എ ആവശ്യപ്പെട്ടത്. കുന്ദമംഗലം താലൂക്ക് രൂപവത്കരിക്കണമെന്ന ആവശ്യം വളരെ പ്രധാനപ്പെട്ടതാണെന്ന് റവന്യൂ മന്ത്രി എ.പി. അനിൽകുമാർ സഭയിൽ പറഞ്ഞു.കോഴിക്കോട് ജില്ലയിലെ താലൂക്കുകളുടെ രൂപവത്കരണത്തിൽ അശാസ്ത്രീയതയുണ്ടെന്നും 13 നിയോജകമണ്ഡലങ്ങളുള്ള ജില്ലയിൽ ആകെയുള്ളത് നാല് താലൂക്കുകൾ മാത്രമാണെന്നും 39 വില്ലേജുകൾ ഉൾപ്പെടുന്ന കോഴിക്കോട് താലൂക്കിലെ ജനസംഖ്യാബാഹുല്യവും വിസ്തൃതിയും കാരണം ഫയലുകൾ തീർപ്പാക്കുന്നതിൽ കാലതാമസം നേരിടുന്നുണ്ടെന്നും മന്ത്രി വ്യക്തമാക്കി.എന്നാൽ, 2027ലെ സെൻസസ് ആവശ്യങ്ങൾക്കായി സംസ്ഥാനത്തെ ഭരണ യൂനിറ്റുകളുടെ അതിർത്തികളിൽ യാതൊരു മാറ്റവും വരുത്തരുതെന്ന് ഉത്തരവുള്ളതിനാൽ സെൻസസ് നടപടികൾ പൂർത്തിയാകുന്ന മുറക്ക് മാത്രമേ പുതിയ താലൂക്കുകൾ രൂപവത്കരിക്കുന്നതുമായി ബന്ധപ്പെട്ട കാര്യങ്ങളിൽ തീരുമാനമെടുക്കാൻ കഴിയുകയുള്ളൂ എന്ന് മന്ത്രി അറിയിച്ചു. പുതിയ താലൂക്കുകൾ രൂപവത്കരിക്കുന്ന സാഹചര്യത്തിൽ കുന്ദമംഗലം ആസ്ഥാനമായുള്ള താലൂക്ക് സർക്കാർ സജീവമായി പരിഗണിക്കുമെന്നും മന്ത്രി ഉറപ്പുനൽകി. നേരത്തെ നിരവധി സംഘടനകൾ കുന്ദമംഗലത്തിന് താലൂക്ക് പദവി നൽകണമെന്ന് ആവശ്യപ്പെട്ടിരുന്നു.

ട്രെയിനിൽ ഉച്ചത്തിൽ ഫോൺ കോളുകളോ പാട്ടുകളോ വച്ചാൽ പിഴയും തടവും.

0

ന്യൂഡൽഹി: ട്രെയിനുകളിലെ ഉ ച്ചത്തിലുള്ള ഫോൺ കോളുക ളും പാട്ടു കേൾക്കലും വീഡി യോ കാണലുമൊക്കെ 1000 രൂപ പിഴ മുതൽ ആറു മാസം വരെ തടവിനുള്ള വകുപ്പുകളാണ്. സഹയാത്രക്കാർക്ക് ശല്യമുണ്ടാക്കുന്ന തരത്തിലെ ഇത്തരം കാര്യങ്ങൾ ചെയ്യുന്നത് കുറ്റകരമാക്കി ദക്ഷിണ റെയിൽവേ വിജ്ഞാപനം പുറപ്പെടുവിച്ചു.ലൗഡ്സ്‌പീക്കറിലോ സ്‌പീ ക്കറിലോ ഉച്ചത്തിൽ പാട്ടുവ യ്ക്കുകയോ വീഡിയോ കാണുകയോ ഫോണുകോളുകൾ ചെയ്യുകയോ ചെയ്താൽ ആദ്യം 1000 രൂപവരെ പിഴ ചുമത്തും. ആവർത്തിച്ചാൽ ആറു മാസം വരെ ജയിൽ ശിക്ഷയോ 5000 രൂപ പിഴയോ അല്ലെങ്കിൽ രണ്ടും കൂടി ഒരുമിച്ചോ അനുഭവിക്കേണ്ടി വരും.റെയിൽവേ സ്റ്റേഷനുകളിലും ട്രെയിനുകളിലും സ്പീക്കറുകളിലൂടെ ഉച്ചത്തിലുള്ള സംഗീതവും ഓഡിയോയും പ്ലേ ചെയ്യുന്നത് മറ്റ് യാത്രക്കാർക്ക് അസൗകര്യമുണ്ടാക്കുന്നുവെന്നും അവരുടെ യാത്രയെയും വിശ്രമത്തെയും ബാധിക്കന്നു വെന്നും കൂടാതെ പലപ്പോഴും ഇത് വലിയ തർക്കങ്ങളിലേക്ക് നീങ്ങുന്നുവെന്നുമുള്ള പരാതി കളുടെ അടിസ്ഥാനത്തിലാണ് നടപടി.ബന്ധപ്പെട്ട വിഷയത്തിൽ സ്റ്റേഷനുകളിലും ട്രെയിനുക ളിലും പബ്ലിക് അനൗൺസ്മെ ൻ്റ് (പിഎ) സംവിധാനങ്ങളിലൂ ടെയും അറിയിപ്പുകളിലൂടെ യും അവബോധം വളർത്താൻ റെയിൽവേ ഡിവിഷനുകൾക്ക് ദക്ഷിണ റെയിൽവേ ആസ്ഥാ നത്തുനിന്ന് നിർദേശം നൽകി യിട്ടുണ്ട്. ഹിന്ദി, ഇംഗ്ലീഷ്, പ്രാ ദേശിക ഭാഷകളിൽ അറിയി പ്പുകൾ നടത്തും.ട്രെയിനിൽ യാത്രക്കാർ ഉച്ച ത്തിൽ സംസാരിക്കുകയോ ദീർഘനേരം മൊബൈൽ ഫോ ണിൽ സംസാരിക്കുകയോ ഉച്ചത്തിലുള്ള റിംഗ്‌ടോണുകൾ ഉപയോഗിക്കുകയോ ചെയ്യരു തെന്ന് റെയിൽവേ ബോർഡിൻ്റെ 2012ലെ നിർദേശങ്ങൾ പ റയുന്നുണ്ട്. ഇതു കൂടാതെ ജനവിശ്വാസ് ബില്ലിൽ ഭേദഗതി വരുത്തി റെയിൽ റെയിൽവേ ചട്ടങ്ങൾ കർശനമാക്കാനും കേന്ദ്രസർക്കാർ ലക്ഷ്യമിടുന്നുണ്ട്.

പൂനൂർ പുഴയിൽ മാലിന്യം തള്ളൽ പതിവാകുന്നു

കൊടുവള്ളി: പൂനൂർ പുഴയിലേക്ക് രാത്രിയുടെ മറവിൽ മാലിന്യം തള്ളുന്നത് പതിവാകുന്നു. സെപ്റ്റിക് ടാങ്കുകളിലെ മാലിന്യം ഉൾപ്പെടെ പുഴയിലും കൈവഴി തോടുകളിലും ഒഴുക്കിവിടുന്നത് ജനങ്ങളിൽ ആശങ്കയുയർത്തുന്നു. കുടിവെള്ള പദ്ധതികളുടെ കിണറുകൾ പ്രവർത്തിക്കുന്ന പുഴയോര മേഖലയിൽ മാലിന്യം തള്ളുന്നത് ഗുരുതരമായ ആരോഗ്യപ്രശ്നങ്ങൾക്ക് കാരണമാകുമെന്ന ആശങ്കയിലാണ് നാട്ടുകാർ.കോഴിക്കോട് നഗരത്തിലേക്കുള്ള വാട്ടർ അതോറിറ്റിയുടെ കുടിവെള്ള പദ്ധതിയുടെയും ജലനിധി ഉൾപ്പെടെയുള്ള നിരവധി കുടിവെള്ള പദ്ധതികളുടെയും കിണറുകൾ പൂനൂർ പുഴയോരത്താണുള്ളത്. കുളിക്കാനും അലക്കാനും ഉൾപ്പെടെ നിരവധി പേരാണ് പുഴയിലെ വിവിധ കടവുകളെ ആശ്രയിക്കുന്നത്. ഈ സാഹചര്യത്തിൽ പുഴയിലേക്ക് മാലിന്യം തള്ളുന്നത് കുടിവെള്ള സ്രോതസ്സുകൾക്കും പൊതുജനാരോഗ്യത്തിനും ഭീഷണിയാകുകയാണ്. വ്യാപാരസ്ഥാപനങ്ങളിലെയും കെട്ടിടങ്ങളിലെയും സെപ്റ്റിക് ടാങ്ക് മാലിന്യം നീക്കം ചെയ്യാൻ കരാറെടുക്കുന്ന ചിലർ ശേഖരിക്കുന്ന മാലിന്യം പുഴയിലേക്ക് ഒഴുക്കിവിടുന്നതായാണ് നാട്ടുകാരുടെ ആരോപണം.ഇത്തരം സംഘങ്ങൾ പിടിയിലാവുകയും ചെയ്താലും നിയമനടപടികളിൽനിന്ന് രക്ഷപ്പെട്ട് വീണ്ടും ഇതേ പ്രവൃത്തി തുടരുന്നതായും നാട്ടുകാർ പറയുന്നു. കഴിഞ്ഞ ഞായറാഴ്ച രാത്രിയും പൂനൂർ പുഴയിൽ മാലിന്യം ഒഴുക്കിയതായി നാട്ടുകാർ പറഞ്ഞു. പൂനൂർ പാലത്തിന് താഴ്ഭാഗത്താണ് വെള്ളത്തിന് ദുർഗന്ധം അനുഭവപ്പെട്ടത്. കുളിക്കാനും അലക്കാനും എത്തിയവരാണ് ദുർഗന്ധം ശ്രദ്ധയിൽപ്പെടുത്തിയത്. ഏതാനും മാസത്തിനിടെ മൂന്നാം തവണയാണ് ഈ ഭാഗത്ത് പുഴയിലേക്ക് മാലിന്യം തള്ളുന്നതെന്നാണ് നാട്ടുകാരുടെ ആരോപണം. പുഴയിൽ തുടർച്ചയായി മാലിന്യം തള്ളുന്നത് പകർച്ചവ്യാധികൾ പടരുന്നതിനും ജലസ്രോതസ്സുകൾ മലിനമാകുന്നതിനും ഇടയാക്കുമെന്ന ആശങ്ക ശക്തമാണ്. മാലിന്യം തള്ളുന്നവരെ കണ്ടെത്താൻ പ്രാദേശിക കൂട്ടായ്മകളുടെ നേതൃത്വത്തിൽ നിരീക്ഷണം ശക്തമാക്കാനുള്ള ഒരുക്കത്തിലാണ് നാട്ടുകാർ.പുഴയിൽ മാലിന്യം തള്ളുന്നവരെ പിടികൂടി കർശന നിയമനടപടി സ്വീകരിക്കണമെന്ന് പശ്ചിമഘട്ട പുഴ സംരക്ഷണ സമിതി ആവശ്യപ്പെട്ടു. അടിയന്തര നടപടി ആവശ്യപ്പെട്ട് പൊലീസിലും തദ്ദേശസ്വയംഭരണ വകുപ്പ് സെക്രട്ടറിമാർക്കും ആരോഗ്യവകുപ്പിനും പരാതി നൽകുമെന്ന് സമിതി ചെയർമാൻ പി.എച്ച്. ത്വാഹ പറഞ്ഞു. പൂനൂർ പുഴയിൽ മാലിന്യം തള്ളുന്നവരെ കണ്ടെത്തി നിയമത്തിനു മുന്നിൽ കൊണ്ടുവരാൻ അധികാരികൾ കർശന നടപടി സ്വീകരിക്കണമെന്ന് കിഴക്കോത്ത് പഞ്ചായത്ത് യു.ഡി.എഫ് ചെയർമാൻ കെ.കെ. ജബ്ബാറും ആവശ്യപ്പെട്ടു.