കോഴിക്കോട് : നാദാപുരം എംഇടി കോളജിൽ സമൂഹമാധ്യമ പോസ്റ്റിന്റെ പേരിൽ ചെറിയ തോതിൽ വെള്ളിയാഴ്ച ആരംഭിച്ച തർക്കം വിദ്യാർഥികൾ തമ്മിൽ ചേരിതിരിഞ്ഞുള്ള സംഘട്ടനത്തിൽ കലാശിച്ചു. ഒട്ടേറെ വിദ്യാർഥികൾക്കു പരുക്കേറ്റു. ഒരു സംഘം പൊലീസ് എത്തി ചൂരൽ പ്രയോഗിച്ചിട്ടും സംഘർഷം നിയന്ത്രിക്കാനാകാതെ വന്നതോടെ കൂടുതൽ പൊലീസ് രംഗത്തെത്തി. ഇതോടെ പരുക്കേറ്റവർ ഉൾപ്പെടെയുള്ളവർ ഓടി രക്ഷപ്പെട്ടു. പരുക്കുകളുമായി ആശുപത്രികളിൽ പ്രവേശിപ്പിച്ചവരും പൊലീസ് ഇടപെടലിനു പിന്നാലെ മുങ്ങി.സംഭവത്തിൽ 22 വിദ്യാർഥികളെ കോളജിൽ നിന്ന് സസ്പെൻഡ് ചെയ്തതായി പ്രിൻസിപ്പൽ ഡോ.ഷാനിഫ് അറിയിച്ചു. മൂന്നാം വർഷം വിദ്യാർഥികളായ 16 പേരെയും ഒന്നാം വർഷ വിദ്യാർഥികളായ ആറു പേരെയുമാണ് സസ്പെൻഡ് ചെയ്തത്. സംഭവത്തിൽ കർശന നടപടി സ്വീകരിക്കാൻ പ്രിൻസിപ്പലിനോട് നിർദേശം നൽകിയതായി എംഇടി ചെയർമാൻ യൂനുസ് ഹസൻ പറഞ്ഞു.ജൂനിയർ വിദ്യാർഥികളിൽ ഒരാളെ മുതിർന്ന വിദ്യാർഥികൾ തിങ്കളാഴ്ച രാവിലെ കോളജിലേക്കുള്ള വഴിയിൽ വളഞ്ഞിട്ടു തല്ലിയതോടെയാണ് സംഘർഷം തുടങ്ങിയതെന്ന് പൊലീസ് പറഞ്ഞു. ഇതിനു പിന്നാലെ സ്കൂട്ടറിലും ബൈക്കിലുമായി എത്തിയ വിദ്യാർഥികൾ ചേരി തിരിഞ്ഞതോടെ കൂട്ടത്തല്ലായി മാറി. കോളജിലേക്കുള്ള വഴിയിൽ വച്ചായിരുന്നു സംഭവം. മാരകമായി പരുക്കേൽക്കാൻ സാധ്യതയുള്ള തരത്തിലുളള സംഘർഷ ദൃശ്യങ്ങൾ പ്രദേശത്തെ വാട്സാപ് ഗ്രൂപ്പുകളിലും മറ്റും പ്രചരിച്ചതോടെ രക്ഷിതാക്കളും കോളജിലേക്ക് എത്തി.പരുക്കേറ്റവരെ താലൂക്ക് ആശുപത്രിയിലും സമീപത്തെ സ്വകാര്യ ആശുപത്രിയിലും എത്തിച്ചെങ്കിലും അവിടെയും ഇവർ ഏറ്റുമുട്ടി. തുടർന്ന് പൊലീസ് എത്തി വിദ്യാർഥികളെ കസ്റ്റഡിയിലെടു ത്തതോടെയാണ് സംഘർഷത്തിന് അയവു വന്നത്. ദേവർകോവിൽ സ്വദേശിയും ഒന്നാം വർഷ വിദ്യാർഥിയുമായ ശങ്കൂന്റകണ്ടി മുഹമ്മദ് നജാദിനെ (19) ഹെൽമറ്റ് ഉപയോഗിച്ചും മറ്റും മർദിച്ചതിന് കണ്ടാലറിയാവുന്ന 6 വിദ്യാർഥികൾക്ക് എതിരെ പൊലീസ് കേസെടുത്തു. ഇതിലേറെ പേർക്ക് മർദനമേറ്റെങ്കിലും കൂടുതൽ പരാതി ലഭിച്ചിട്ടില്ലാത്തതിനാൽ മറ്റു കേസെടുത്തിട്ടില്ലെന്ന് നാദാപുരം പൊലീസ് അറിയിച്ചു. അതേസമയം, കോളജിലെ സംഘർഷത്തിന്റെ തുടർച്ചയെന്നോണം തൂണേരി പട്ടാണിയിൽ പരസ്പരം ഏറ്റുമുട്ടിയ 10 വിദ്യാർഥികൾക്ക് എതിരെ പൊലീസ് കേസെടുത്തു. കായക്കൊടിയിലെ വി.കെ.പി.മുഹമ്മദ് ഷിസാൻ, വിലാതപുരം കളത്തിൽ മുഹമ്മദ് ജുമാൻ, നാദാപുരം വണ്ണാൻകണ്ടി താഴെ മുഹമ്മദ് ശഹാസ്, ചെറുമോത്ത് പുള്ളച്ചാണ്ടിയിൽ പി.സി.മുഹമ്മദ് സിനാൻ എന്നിവരെ പൊലീസ് അറസ്റ്റ് ചെയ്തു. പൊലീസ് നേരിട്ട് റജിസ്റ്റർ ചെയ്ത കേസിലാണ് അറസ്റ്റ്. എസ്ഐ കെ.കെ.സുരേഷ് ബാബുവും സംഘവുമാണ് ഇവരെ അറസ്റ്റ് ചെയ്തത്. കണ്ടാലറിയാവുന്ന 6 പേരെ കൂടി അറസ്റ്റ് ചെയ്യാനുണ്ട്.
മദ്യപിച്ചെത്തി വിദ്യാർഥികളെ ഇടിവളയിട്ട് മർദിച്ചു; പൊലീസ് ഉദ്യോഗസ്ഥന് സസ്പെൻഷൻ.
പാലക്കാട് : എആർ ക്യാമ്പിലെ സിവിൽ പൊലീസ് ഓഫീസർ ചിറ്റിലഞ്ചേരി സ്വദേശി ഷഫാദിനെതിരെയാണ് നടപടി എസ്എഫ്ഐ വിദ്യാർഥികളെ മദ്യപിച്ചെത്തി, ഇടിവളയിട്ട് മർദിച്ച പൊലീസ് ഉദ്യോഗസ്ഥനെതിരെ നടപടി. പാലക്കാട് എആർ ക്യാമ്പിലെ സിവിൽ പൊലീസ് ഓഫീസർ ചിറ്റിലഞ്ചേരി സ്വദേശി ഷഫാദിനെ സസ്പെൻഡ് ചെയ്തു. പാലക്കാട് ജില്ലാ പൊലീസ് മേധാവിയുടേതാണ് നടപടി.ഇക്കഴിഞ്ഞ 11നാണ് പാലക്കാട് ടൗൺ റെയിൽവേ സ്റ്റേഷനിലേക്ക് എസ്എഫ്ഐ നടത്തിയ മാർച്ചിൽ മദ്യപിച്ച് എത്തിയ സഫാദ് പ്രവർത്തകരെ മർദിച്ചത്. ചിറ്റൂർ താലൂക്ക് ആശുപത്രിയിൽ നടത്തിയ മെഡിക്കൽ പരിശോധനയിലാണ് സഫാദ് മദ്യപിച്ചതായി കണ്ടെത്തിയത്.ദില്ലിയിൽ മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ സമരം ചെയ്യുന്നവരെ അടിച്ചമർത്തുന്നതിനെതിരെ പാലക്കാട് സമാധാനപരമായി പ്രതിഷേധിച്ച എസ്എഫ്ഐ പ്രവർത്തകർക്ക് നേരെയാണ് പൊലീസ് അതിക്രമം അഴിച്ചുവിട്ടത്. പെൺകുട്ടികൾക്ക് നേരെയടക്കം അതിക്രമം നടത്തിയിരുന്നു.
തെറ്റായ ദിശയിലെത്തി ബസ് സ്കൂട്ടറിലേക്ക് ഇടിച്ചുകയറി, തിരൂരിൽ 35കാരിക്ക് ദാരുണാന്ത്യം, ഒപ്പമുണ്ടായിരുന്ന ഉമ്മയുടെ വേർപാടറിയാതെ മക്കൾ.
തിരൂർ : അമ്മയുടെ വേര്പാടറിയാതെ ആശുപത്രിക്കിടക്കയില് ഗുരുതരാവസ്ഥയില് കഴിയുന്ന രണ്ടു കുട്ടികള്. അപ്രതീക്ഷിതമായ അപകടത്തില് കുടുംബത്തിന്റെ താങ്ങും തണലുമായ യുവതിയെ നഷ്ടപ്പെട്ടതിന്റെ വേദനയില് ഒരു നാട്. തിരൂര് പൂക്കയില് റോഡില് ബസും സ്കൂട്ടറും കൂട്ടിയിടിച്ചുണ്ടായ അപകടത്തിലാണ് താനാളൂര് വലിയപാടം സ്വദേശിനിയും നിറമരുതൂര് പഞ്ചാരമൂല മേലെ വീട്ടില് ഹിഷാമിന്റെ ഭാര്യയുമായ തെസ്നി (35) ആണ് അപകടത്തില് മരിച്ചത്. സ്കൂട്ടറിലുണ്ടായിരുന്ന കുട്ടികളായ ഫാത്തിമ ഷെസ (14), ഷെസാന് മുസ്തഫ (8) എന്നിവര്ക്ക് ഗുരുതരമായി പരിക്കേറ്റു.കൂട്ടായി തിരൂര് റൂട്ടിലോടുന്ന കല്ലിങ്ങല് ബസാണ് അപകടത്തില്പ്പെട്ടത്. ഇന്നലെ വൈകിട്ട് ഏഴോടെ പൂക്കയില് റോഡിലായിരുന്നു അപകടം. കൂട്ടായിയില്നിന്ന് തിരൂരിലേക്ക് വരികയായിരുന്ന ബസ് എതിര്ദിശയിലേക്ക് കയറി തിരൂര് ഭാഗത്തുനിന്ന് ഉണ്യാല് ഭാഗത്തേക്ക് പോവുകയായിരുന്ന സ്കൂട്ടറില് ഇടിക്കുകയായിരുന്നു. ഇടിയുടെ ആഘാതത്തില് സ്കൂട്ടര് ബസിനടിയില് കുടുങ്ങി. സ്കൂട്ടറുമായി കുറച്ചുദൂരം മുന്നോട്ടുപോയ ശേഷമാണ് ബസ് നിന്നത്. അപ്പോഴും തെസ്നി ബസിനടിയിലായിരുന്നു. അപകടത്തിന്റെ ആഘാതത്തില് യുവതിക്ക് സംഭവസ്ഥലത്തുതന്നെ ജീവന് നഷ്ടമായി. അമ്മയോടൊപ്പം യാത്ര ചെയ്യുന്നതിനിടെയാണ് കുട്ടികള്ക്ക് അപകടത്തില് പരിക്കേറ്റത്. ഗുരുതരമായി പരിക്കേറ്റ ഇരുവരെയും ഉടന് കോട്ടക്കലിലെ സ്വകാര്യ ആശുപത്രിയില് പ്രവേശിപ്പിച്ചു. കുട്ടികളുടെ ആരോഗ്യനിലയെക്കുറിച്ച് കുടുംബവും നാട്ടുകാരും ആശങ്കയിലാണ്. അമ്മയുടെ മരണവാര്ത്ത പോലും അറിയാതെ ചികിത്സയില് കഴിയുന്ന കുട്ടികളുടെ അവസ്ഥ ബന്ധുക്കളെയും നാട്ടുകാരെയും ഏറെ വേദനിപ്പിക്കുന്നു. അപകടത്തിന് പിന്നാലെ ബസ് ഡ്രൈവര് സ്ഥലത്തുനിന്ന് ഓടിപ്പോയതായാണ് വിവരം. സംഭവത്തില് ബസ് പൊലീസ് കസ്റ്റഡിയിലെടുത്തിട്ടുണ്ട്. ഡ്രൈവറെ കണ്ടെത്തുന്നതിനും അപകടത്തിന്റെ യഥാര്ഥ കാരണം വ്യക്തമാക്കുന്നതിനുമായി പൊലീസ് അന്വേഷണം ആരംഭിച്ചു. റോങ് സൈഡിലേക്ക് ബസ് കയറിയ സാഹചര്യം ഉള്പ്പെടെയുള്ള കാര്യങ്ങള് അന്വേഷണത്തില് പരിശോധിക്കും.മരിച്ച തെസ്നിയുടെ മൃതദേഹം തിരൂര് ജില്ലാ ആശുപത്രി മോര്ച്ചറിയിലേക്ക് മാറ്റി. തിരൂര് പൊലീസ് കേസെടുത്ത് തുടര്നടപടികള് സ്വീകരിച്ചുവരികയാണ്.
കോഴിക്കോട് റെയിൽവേ സ്റ്റേഷനിലെ അനൗൺസ്മെന്റ് പിഴവ്: വിശദീകരണം തേടി റെയിൽവേ.
കോഴിക്കോട് : കോഴിക്കോട് റെയിൽവേ സ്റ്റേഷനിൽ അനൗൺസ്മെന്റിൽ പിഴവ് വന്ന സംഭവത്തിൽ വിശദീകരണം തേടി റെയിൽവേ. സംഭവത്തിൽ ഇൻഫർമേഷൻ സെന്ററിന് പിഴവുണ്ടായെന്ന് കണ്ടെത്തിയിരുന്നു.ഒന്നാം പ്ലാറ്റ്ഫോമിൽ പരശുരാം എക്സ്പ്രസിനായി കാത്തുനിന്ന യാത്രക്കാരോട് പെട്ടെന്ന് മൂന്നാമത്തെ പ്ലാറ്റ്ഫോമിലേക്ക് മാറാൻ അനൗൺസ്മെന്റിലൂടെ നിർദ്ദേശം നൽകി. ഇതനുസരിച്ച് യാത്രക്കാർ ലഗേജുകളുമായി ട്രാക്ക് മുറിച്ചുകടന്ന് മൂന്നാം പ്ലാറ്റ്ഫോമിലേക്ക് ഓടി.തൊട്ടുപിന്നാലെ ട്രെയിൻ ഒന്നാം പ്ലാറ്റ്ഫോമിലേക്ക് തന്നെ വരുമെന്ന് വീണ്ടും അനൗൺസ്മെന്റ് വന്നതോടെ യാത്രക്കാർ വീണ്ടും ഒന്നാം പ്ലാറ്റ്ഫോമിലേക്ക് തിരികെ ഓടേണ്ടി വന്നു. പ്ലാറ്റ്ഫോമിന്റെ ഉയരം കൂടിയ ഭാഗത്ത് കൂടി ലഗേജുകളുമായി ജീവൻ പണയം വെച്ചാണ് യാത്രക്കാർ കയറിയത്. സംഭവത്തിൽ അപകടം ഒഴിവായത് തലനാരിഴയ്ക്കാണ്.കോഴിക്കോട് റെയിൽവേ സ്റ്റേഷനിൽ ഉണ്ടായ ഈ ഗുരുതരമായ വീഴ്ചയിൽ ഇൻഫർമേഷൻ സെന്ററുമായി ബന്ധപ്പെട്ട് ഉദ്യോഗസ്ഥരോട് റെയിൽവേ വിശദീകരണം തേടിയിട്ടുണ്ട്. കോഴിക്കോട് റെയിൽവേ സ്റ്റേഷൻ ഡെപ്യൂട്ടി ജനറൽ മാനേജർ രാജീവ് നാരായണനാണ് ഇതുസംബന്ധിച്ച് വിശദീകരണം ആവശ്യപ്പെട്ടത്.
തുലാവർഷം രണ്ടു ദിവസത്തിനകം; 18 വരെ കനത്തമഴയ്ക്ക് സാധ്യത
തിരുവനന്തപുരം: വടക്കുകിഴക്കൻ കാലവർഷം അഥവാ തുലാവർഷം രണ്ടു ദിവസത്തിനകം എത്തുമെന്ന് കാലാവസ്ഥാ വകുപ്പ്. കേരളത്തിൽ 15 മുതൽ 18 വരെ കനത്തമഴ പ്രതീക്ഷിക്കുന്നുണ്ട്. മഞ്ഞ മുന്നറിയിപ്പ്: 15-ന് തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി. 16-ന് ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, വയനാട്.തെക്കുപടിഞ്ഞാറൻ കാലവർഷം രണ്ടുദിവസത്തിനകം രാജ്യത്തുനിന്ന് പൂർണമായി പിൻമാറും. ഇതേത്തുടർന്ന് തുലാവർഷമെത്തും.
സംസ്ഥാന സ്കൂൾ കായികമേള: ഭാഗ്യചിഹ്നം ‘കുട്ടു’ പ്രകാശനം ചെയ്തു.
തിരുവനന്തപുരം: ഏഷ്യയിലെതന്നെഏറ്റവും വലിയ കൗമാര കായികമേള യായ സംസ്ഥാന സ്കൂൾ കായിക മേളയുടെ ഭാഗ്യ ചിഹ്നം കുട്ടു പ്രകാശനം ചെയ്തു. നിയമസഭാ മീഡിയാ റൂമിൽ നടന്ന ചടങ്ങിൽ പൊതുവിദ്യാഭ്യാസ വകുപ്പ് മന്ത്രി എൻ. ഷംസുദ്ദീൻ സംഘാടക സമിതി ചെയർമാൻ എം.എ. റസാഖിന് ഭാഗ്യചിഹ്നം നൽകിയാണ്പ്രകാശനം നിർവ്വഹിച്ചത്. ചടങ്ങിൽ എംഎൽഎ മാരായ പാറയ്ക്കൽ അബ്ദുള്ള, കെ.കെ. രമ, പി.കെ ഫിറോസ്, കെ. പ്രവീൺ കുമാർ, സി.കെ. കാസിം, കെ.ജയന്ത്, അഡ്വ. ഫൈസൽ ബാബു, കെ.എം. അഭിജിത്ത്, വി.ടി. സൂരജ്, വിദ്യ ബാലകൃഷ്ണൻ, പൊതുവിദ്യാഭ്യാസ വകുപ്പ് സെക്രട്ടറി ഡോ.ഡി. സജിത്ത് ബാബു, ഡയറക്ടർ അരുൺ കെ. വിജയൻ, എഡിജി സി.എസ്. സന്തോഷ്, സ്പോട്സ് ജോയിന്റ് ഡയറക്ടർ പി.ആർ. ശ്രീജേഷ് തുടങ്ങിയവർ പങ്കെടുത്തു. കുട്ടുവിനെ രൂപകൽപന ചെയ്തത് കൊല്ലം ജില്ലയിലെ കെഎൻഎൻഎം എ ച്ച്എസ്എസ് ആൻഡ് വിഎച്ച്എസ് എസിലെ എട്ടാം ക്ലാസ് വിദ്യാർഥിനിയാ യ ആർ.എസ്. ലക്ഷ്മിനന്ദനയാണ്.
ഒക്ടോബർ 15 മുതൽ രണ്ടായിരം രൂപയ്ക്ക് മുകളിൽ യുപിഐ പേമന്റുകൾ സ്വീകരിക്കില്ല-ഹോട്ടലുടമകൾ.
കൊച്ചി: ഒക്ടോബർ 15 മുതൽ സംസ്ഥാനത്തെ ഹോട്ടലുകളിലും, റസ്റ്ററന്റുകളിലും 2000 രൂപയ്ക്ക് മുകളിലുള്ള യു.പി.ഐ. പേമൻ്കൾ സ്വീകരിക്കില്ലെന്ന് കേരള ഹോട്ടൽ ആൻഡ് റസ്റ്ററന്റ് അസോസിയേഷൻ അറിയിച്ചു. രണ്ടായിരം രൂപയ്ക്ക് മുകളിലുള്ള യു.പി.ഐ. ഇടപാടുകൾക്ക് ഫീസ് ഈടാക്കാനുള്ള നീക്കത്തിൽ പ്രതിഷേധിച്ചാണിത്.സൗകര്യപ്രദമായി പണം കൈമാറുവാൻ കഴിയുന്ന യു.പി.ഐ. സംവിധാനത്തിൽ ഫീസ് ഏർപ്പെടുത്തുന്നത് ഡിജിറ്റൽ ഇടപാടുകളെ നിരുത്സാഹപ്പെടുത്തും. 2000 രൂപയ്ക്ക് മുകളിലുള്ള യു.പി.ഐ. ഇടപാടുകൾക്ക് ഫീസ് ഈടാക്കാനുള്ള നീക്കം അധികൃതർ പിൻവലിക്കുകയോ, ഫീസിന്റെ പരിധി പതിനായിരം രൂപയ്ക്ക് മുകളിലുള്ള ഇടപാടുകൾക്കായി ഉയർത്തുകയോ വേണമെന്ന് അസോസിയേഷൻ പ്രസിഡൻ്റ് ജി. ജയപാലും, ജനറൽ സെക്രട്ടറി എൻ. അബ്ദുൾ റസാഖും വ്യക്തമാക്കി.
ജനാധിപത്യ ധ്വംസനം: ദേശീയ പ്രക്ഷോഭത്തിന് ഐക്യദാർഢ്യം പ്രഖ്യാപിച്ച് പെൻഷനേഴ്സ് യൂണിയൻ.
താമരശ്ശേരി: രാജ്യത്ത് നടക്കുന്ന ജനാധിപത്യ ധ്വംസനങ്ങൾക്കെതിരെയുള്ള ദേശീയ പ്രക്ഷോഭത്തിന് ശക്തമായ ഐക്യദാർഢ്യവും പിന്തുണയും പ്രഖ്യാപിച്ച് കേരള സ്റ്റേറ്റ് സർവ്വീസ് പെൻഷനേഴ്സ് യൂണിയൻ (കെ.എസ്.പി.യു) കൊടുവള്ളി ബ്ലോക്ക് കമ്മിറ്റി.പ്രതിഷേധത്തിന്റെ ഭാഗമായി ബ്ലോക്കിലെ മുഴുവൻ യൂണിറ്റുകളിൽ നിന്നുമുള്ള പ്രവർത്തകരെ അണിനിരത്തി താമരശ്ശേരി ടൗണിൽ വൻ ഐക്യദാർഢ്യ റാലിയും പൊതുസമ്മേളനവും സംഘടിപ്പിച്ചു.ജനാധിപത്യ മൂല്യങ്ങളെ തകർക്കുന്നതും രാജ്യത്തെ ലക്ഷക്കണക്കിന് പൗരന്മാരുടെ അടിസ്ഥാന അവകാശമായ വോട്ടവകാശം കവർന്നെടുക്കുന്നതുമായ തിരഞ്ഞെടുപ്പ് കമ്മീഷന്റെ നടപടികൾ അന്യായവും ജനാധിപത്യ വിരുദ്ധവുമാണെന്ന് പൊതുസമ്മേളനം കുറ്റപ്പെടുത്തി. ഏകപക്ഷീയമായ നടപടികളിലൂടെ എസ്.ഐ.ആർ ക്രമക്കേടുകൾക്ക് ഉത്തരവാദിയായ രാജ്യത്തെ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ ഉടൻ സ്വയം രാജിവെക്കണമെന്നും, അല്ലാത്തപക്ഷം കേന്ദ്ര സർക്കാർ അദ്ദേഹത്തെ പുറത്താക്കണമെന്നും യോഗം പ്രമേയത്തിലൂടെ ആവശ്യപ്പെട്ടു.കെ.എസ്.പി.യു ജില്ലാ പ്രസിഡന്റ് കെ.വി. ജോസഫ് സമ്മേളനം ഉദ്ഘാടനം ചെയ്തു. ബ്ലോക്ക് കമ്മിറ്റി പ്രസിഡന്റ് കെ.കെ. അബ്ദുറഹ്മാൻകുട്ടി ചടങ്ങിൽ അദ്ധ്യക്ഷത വഹിച്ചു. ഡോ. ടി.കെ. അബ്ബാസലി മുഖ്യപ്രഭാഷണം നടത്തി.ബ്ലോക്ക് കമ്മിറ്റി സെക്രട്ടറി ടി.ടി. സദാനന്ദൻ, ട്രഷറർ കെ. നാരായണൻ, ജില്ലാകമ്മിറ്റി അംഗം വി.പി. ഇന്ദിര, സാംസ്കാരികവേദി കൺവീനർ എ.എം. അബ്ബാസ്, വനിതാവേദി കൺവീനർ പി. സൈനബ എന്നിവർ ആശംസകൾ അർപ്പിച്ച് സംസാരിച്ചു.
മിനി കൂപ്പർ അപകടം; സുഹൈൽ സജീവിനെയും നിനവിനെയും കാക്കനാട് ദുർഗുണപരിഹാര പാഠശാലയിലേയ്ക്ക് മാറ്റി.
മൂന്നുപേരുടെ ജീവനെടുത്ത നെടുമ്പാശേരി വാഹനാപകടത്തിൽ അറസ്റ്റിലായ സുഹൈൽ സജീവ്, സുഹൃത്ത് നിനവ് എന്നിവരെ കാക്കനാട് ദുർഗുണപരിഹാര പാഠശാലയിലേയ്ക്ക് മാറ്റി. ഇന്നലെ ആലുവ മജിസ്ട്രേറ്റിന് മുന്നിൽ ഹാജരാക്കിയ സുഹൈലിനെ 14 ദിവസത്തേയ്ക്ക് റിമാൻഡ് ചെയ്തതിന് പിന്നാലെയാണ് ദുർഗുണപരിഹാര പാഠശാലയിലേയ്ക്ക് മാറ്റിയത്. ഇരുവർക്കും 19 വയസാണ് പ്രായമെന്നും ജയിൽ ചട്ടമനുസരിച്ചാണ് നടപടിയെന്നുമാണ് അധികൃതർ അറിയിച്ചത്.സർക്കാർ നിയമവും പ്രായവും പരിഗണിച്ചാണ് ജയിലിനുള്ളിലെ ദുർഗുണപരിഹാര പാഠശാലയിലേയ്ക്ക് സുഹൈലിനെയും നിനവിനെയും മാറ്റിയതെന്ന് ജയിൽ ഡിജിപി എസ് ശ്രീജിത്ത് പറഞ്ഞു. 18നും 21നുമിടയിൽ പ്രായമുള്ളവർ അറസ്റ്റിലായാൽ ജയിലിലെ സെല്ലിൽ അല്ല, ദുർഗുണപരിഹാര പാഠശാലയിലേക്കാണ് മാറ്റുന്നതെന്നും അദ്ദേഹം അറിയിച്ചു.അമിതവേഗതയിലാണ് കാറോടിച്ചതെന്ന് സുഹൈൽ പൊലീസിനോട് സമ്മതിച്ചു. എയർപോർട്ട് റോഡിലൂടെ 120 കിലോമീറ്റർ വേഗതയിലാണ് വാഹനമോടിച്ചതെന്നും ഈ സമയം മദ്യലഹരിയിലായിരുന്നുവെന്നും പ്രതിയുടെ മൊഴിയിലുണ്ട്. അപകടസമയത്തെ കാറിന്റെ വേഗമറിയാൻ വിദഗ്ദ്ധ പരിശോധന നടത്തും.നെടുമ്പാശേരി വിമാനത്താവളത്തിന് സമീപം മിനി കൂപ്പർ കാർ സ്കൂട്ടറിലിടിച്ചായിരുന്നു അപകടമുണ്ടായത്. ഒരു സ്കൂട്ടറിൽ യാത്ര ചെയ്യുകയായിരുന്ന വയനാട് കൽപ്പറ്റ മടക്കിമല സന്തോഷ് ഭവനിൽ കല്യാണ മന്ദിരം എസ്റ്റേറ്റിലെ റൈറ്റർ സന്തോഷിന്റെ മകൾ ദേവിക (കുക്കു- 21), പാലക്കാട് മണ്ണാർക്കാട് ഇടക്കൂർശ്ശി നെല്ലാറ്റ കരിമ്പ മുള്ളങ്കുഴി വീട്ടിൽ ഓട്ടോഡ്രൈവറായ എം.ആർ.പ്രദീപ്കുമാറിന്റെ മകൾ ഗോപിക (22), കർണാടക കൂർഗ് കനകമഞ്ചൽ വീട്ടിൽ ഇബ്രാഹിമിന്റെ മകൻ ഇയ്യാസ് (21) എന്നിവരാണ് മരിച്ചത്.കാക്കനാട് ഗോൾഡ് ടവറിൽ താമസിക്കുന്ന ആലപ്പുഴ ആലിശേരി സജീവ് ജമാൽ മൻസിലിൽ സുഹൈൽ സജീവ് ആണ് കാറോടിച്ചിരുന്നത്. ‘ഇഹ ഡിസൈൻസ്” വസ്ത്ര സ്ഥാപനത്തിന്റെ ചെയർമാൻ സജീവിന്റെയും സ്ഥാപനത്തിന്റെ എം.ഡിയായ പുഞ്ചപ്പാടത്ത് നൂഹയുടേയും മകനാണ് സുഹൈൽ. കാക്കനാട് രാജഗിരി കോളേജിലെ ബി.കോം വിദ്യാർത്ഥിയാണ്. കാറിലുണ്ടായിരുന്ന സുഹൃത്ത് നിനവാണ് കേസിലെ രണ്ടാം പ്രതി. നിനവിന്റെ സുഹൃത്തുക്കളായ അമീറിനും ജോയലിനുമെതിരെയും പ്രേരണാകുറ്റം ചുമത്തി കേസ് രജിസ്റ്റർ ചെയ്തിട്ടുണ്ട്.*
എസ്ഐആറിൽ ഗുരുതര ക്രമക്കേടുകൾ’: സുപ്രിംകോടതിയിൽ ഹരജി നൽകി രാഹുൽ ഗാന്ധി.
ന്യൂഡൽഹി: എസ്ഐആർ വഴി വോട്ടർമാരെ ഒഴിവാക്കിയെന്നും ഗുരുതര ക്രമക്കേടുകൾ നടന്നുവെന്നും കാണിച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധി സുപ്രിംകോടതിയിൽ ഹരജി നൽകി.എസ്ഐആർ നടപടികൾ ഉടനടി നിർത്തിവെക്കണമെന്നും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ ഏകപക്ഷീയമായ തീരുമാനങ്ങൾ നടപ്പിലാക്കി എന്നും ഹരജിയിൽ ആരോപിക്കുന്നു. തെരഞ്ഞെടുപ്പ് കമ്മീഷന്റെ തീരുമാനങ്ങളെ ചോദ്യം ചെയ്താണ് ഹരജി.രാഹുൽ ഗാന്ധിക്ക് വേണ്ടി അഭിഭാഷകരാണ് ഹരജി ഫയൽ ചെയ്തത്. ഇന്ത്യ സഖ്യത്തിന്റെ ചലോ ദില്ലി മാർച്ച് പുരോഗമിക്കുന്നതിനിടെ വൈകീട്ട് 4.45 ഓടെയാണ് ഹരജി സമർപ്പിച്ചത്.നേരത്തെ വിഷയത്തിൽ ചീഫ് ജസ്റ്റിസുമായി കൂടിക്കാഴ്ചയ്ക്ക് രാഹുൽ ഗാന്ധി അനുമതി തേടിയിരുന്നെങ്കിലും സമാനമായ വിഷയങ്ങൾ കോടതിയുടെ പരിഗണനയിലുള്ളതിനാൽ കൂടിക്കാഴ്ച നിഷേധിക്കുകയായിരുന്നു. ഹരജി നൽകാൻ സ്വാതന്ത്ര്യമുണ്ടെന്നും ഇതുമായി ബന്ധപ്പെട്ട കേസുകൾ ഒക്ടോബർ 13ന് പരിഗണിക്കുമ്പോൾ രാഹുൽ ഗാന്ധിയുടെ ഹരജിയും പരിഗണിക്കാമെന്നും ചീഫ് ജസ്റ്റിസ് അറിയിച്ചിരുന്നു. തുടർന്നാണ് റിട്ട് ഹരജിയുമായി സുപ്രിംകോടതിയെ സമീപിച്ചത്. ഹരജി നാളെ (ചൊവ്വാഴ്ച) പരിഗണിക്കും.അതേസമയം ഗ്യാനേഷ് കുമാറിന്റെ രാജി ആവശ്യപ്പെട്ടുള്ള ഇന്ത്യ സഖ്യത്തിന്റെ ഇന്നത്തെ പ്രതിഷേധം അവസാനിപ്പിച്ചു. സുപ്രിംകോടതിക്ക് 200 മീറ്റർ അകലെ ബാരിക്കേഡുകൾ സ്ഥാപിച്ച് പൊലീസ് മാർച്ച് തടഞ്ഞതോടെ പ്രതിഷേധക്കാരും പൊലീസും തമ്മിൽ ഉന്തും തള്ളുമുണ്ടായി. മണ്ഡി ഹൗസ് റോഡിൽ പൊലീസ് ലാത്തിവീശുകയും ചെയ്തു.



