spot_img
Friday, November 20, 2026
Home Blog Page 75

ഡ്രാഗൺ ഹൗസ്! 10 തൈകളിൽ തുടങ്ങി, ഇപ്പോൾ 140 ചെടികളിലെത്തി; കൃഷി ടെറസിൽ 20 ലീറ്റർ പെയിന്റ് ബക്കറ്റുകളിൽ.

0

കോഴിക്കോട് : കൃഷി നിങ്ങളുടെ അഭിരുചിയാണെങ്കിൽ, അതു നിങ്ങളുടെ ഹൃദയത്തിലുണ്ടെങ്കിൽ ഏക്കറുകണക്കിനു സ്ഥലമൊന്നും വേണ്ട അതു വിജയിപ്പിക്കാനെന്നു തെളിയിച്ചതാണ് പി.വിശ്വന്റെ കഥ. ഫറോക്ക് നഗരസഭയിലെ ഇരുപത്തഞ്ചാം വാർഡിൽ ഉൾപ്പെട്ട പനോളിപറമ്പിലെ ഇരുനില ടെറസ് വീടിനു മുകളിലെ ഡ്രാഗൺ ഫ്രൂട്ട് കൃഷിയാണ് ഈ അഭിരുചിയുടെ കഥ പറയുന്നത്. കൃഷിയോട് പണ്ടു മുതലേയുള്ള വിശ്വന്റെ താൽപര്യത്തിന് ഡ്രാഗൺ ഫ്രൂട്ടിലൊരു സാധ്യതയുണ്ടെന്ന സൂചന നൽകിയതു സമൂഹമാധ്യമങ്ങളിലൂടെ ലഭിച്ച വിവരങ്ങളാണ്.ജില്ലയിൽ ഈ രീതിയിൽ കൃഷി വിജയിപ്പിച്ച ചിലരുടെ അനുഭവസാക്ഷ്യങ്ങൾ വിശ്വനു പ്രോത്സാഹനവുമായി. 10 തൈകളിൽ തുടങ്ങിയ ഡ്രാഗൺ ഫ്രൂട്ട് കൃഷി ഇപ്പോൾ 140 ചെടികളിലെത്തി. 5 വർഷമായി വിശ്വൻ ഈ രംഗത്തുണ്ട്. പൂർണമായും ജൈവ കൃഷിയാണ്. അതുകൊണ്ടുതന്നെ ആവശ്യക്കാർ വിശ്വനെ തേടിയെത്തുകയാണ് പതിവ്. വിപണിയിൽ നിന്നു ലഭിക്കുന്ന പഴത്തേക്കാൾ രുചിയും ഗുണവും ഉയർന്ന നിലവാരത്തിൽ നമ്മുടെ സ്വന്തം തോട്ടത്തിലെ ഉൽപന്നങ്ങൾക്കു ലഭിക്കുമെന്നു സ്വന്തം അനുഭവത്തിലൂടെ ഇദ്ദേഹം ഉറപ്പു നൽകുന്നു.20 ലീറ്റർ പെയിന്റ് ബക്കറ്റുകളിലാണ് ഇദ്ദേഹം തന്റെ ടെറസിനു മുകളിൽ ഈ കൃഷി ചെയ്യുന്നത്. ചെടിയിൽനിന്ന് മൂത്ത കമ്പ് 10 ഇഞ്ച് വലുപ്പത്തിൽ മുറിച്ചെടുത്താണ് തൈകളാക്കാൻ വേരു പിടിപ്പിക്കുന്നത്. 3 മാസം വളർച്ചയായാൽ ബക്കറ്റിലേക്ക് മാറ്റിനടും. മുക്കാൽ ഇഞ്ച് വലുപ്പത്തിൽ 3 ദ്വാരങ്ങൾ ഇട്ട ബക്കറ്റിൽ കരിയില, എല്ലുപൊടി, വേപ്പിൻപിണ്ണാക്ക്, ചാണകപ്പൊടി, ചകിരിച്ചോർ, മണ്ണ് എന്നിവ ചേർത്ത മിശ്രിതം ബക്കറ്റിന്റെ പാതി ഭാഗത്ത് നിറച്ച ശേഷം അതിലേക്കാണ് തൈകൾ മാറ്റി നടുന്നത്. പിന്നീട് പച്ചച്ചാണകം, കടലപ്പിണ്ണാക്ക്, ശർക്കര എന്നിവ ചേർത്ത ലായനി 5 ദിവസംകൊണ്ടു പുളിപ്പിച്ചെടുത്തശേഷം നേർപ്പിച്ചു വളമായി നൽകും. ഒരു കപ്പ് ലായനിയിൽ 9 കപ്പ് വെള്ളം ചേർത്താണ് നേർപ്പിക്കുക. 8 മാസത്തിനകം പൂവിടും. 30 ദിവസംകൊണ്ട് കായ്‌ഫലം ലഭിച്ചുതുടങ്ങും. 15 പഴങ്ങൾ വരെ ഒരു ചെടിയിൽനിന്നു ലഭിക്കുന്നുണ്ട്.വളത്തിനൊപ്പം നല്ല വെയിലാണു ഡ്രാഗൺ ഫ്രൂട്ടിന് ആവശ്യം. വെള്ളം കെട്ടിനിൽക്കാതെ ചെടികൾ സംരക്ഷിക്കുകയാണ് പരിചരണത്തിൽ പ്രധാനവും. താൽപര്യമുള്ള ആർക്കും ഈ കൃഷി ചെയ്യാവുന്നതാണെന്ന് സ്വന്തം അനുഭവം വ്യക്തമാക്കി അദ്ദേഹം ഉറപ്പു നൽകുന്നു. ആവശ്യക്കാർക്ക് തൈകളും കൃഷിരീതിയും വിശ്വനിൽ നിന്നു ലഭിക്കും. വിളിക്കാം: 98472 48569.ടെറസിനു പുറത്തും ഇദ്ദേഹത്തിന് അത്യാവശ്യം മറ്റു കൃഷികളുമുണ്ട്. വീടിന് ചുറ്റും മഞ്ഞൾ, കപ്പ, ചേന എന്നിവയാണു കൃഷി ചെയ്യുന്നത്. 8 വലിയ ചട്ടികളിലായി വളർത്തുന്ന കുറ്റിക്കുരുമുളകു ചെടികളിൽ നിന്ന് വീട്ടാവശ്യത്തിനുള്ള കുരുമുളകും ലഭിക്കുന്നുണ്ട്.

കൊല്ലത്ത് സ്വകാര്യ ബസുകൾ കൂട്ടിയിടിച്ച് 34 പേർക്ക് പരിക്ക്.

കൊട്ടാരക്കര: ശാസ്താംകോട്ട റോഡിൽ പുത്തൂർ ചുങ്കത്തറയിൽ സ്വകാര്യ ബസുകൾ കൂട്ടിയിടിച്ച് ഡ്രൈവർ ഉൾപ്പെടെ നിരവധി യാത്രക്കാർക്ക് പരിക്ക്. പരിക്കേറ്റവരെ പുത്തൂർ സ്വകാര്യ ആശുപത്രി, കൊട്ടാരക്കര താലൂക്ക് ആശുപത്രി, തിരുവനന്തപുരം മെഡിക്കൽ കോളജ് ആശുപത്രി എന്നിവിടങ്ങളിൽ പ്രവേശിപ്പിച്ചു. ആരുടെയും നില ഗുരുതരമല്ല. ഞായറാഴ്ച രാവിലെ 11.20നായിരുന്നു അപകടം.കൊട്ടാരക്കരയിൽനിന്ന് കായംകുളത്തേക്ക് പോയ നിർമ്മാല്യം ബസും ഭരണിക്കാവിൽ നിന്ന് കൊട്ടാരക്കരയ്ക്ക് വന്ന സൊസൈറ്റി ബസും കൂട്ടിയിടിച്ചാണ് അപകടം. നിയന്ത്രണം വിട്ട സൊസൈറ്റി ബസ് സമീപത്തെ കടയുടെ മതിൽ ഇടിച്ചു തകർത്തു. ബസിൽ കുരുങ്ങിയ സൊസൈറ്റി ബസ് ഡ്രൈവർ പെരുംകുളം കൊച്ചുവിള കിഴക്കതിൽ അജയകുമാറിനെ (49) ഡ്രൈവർ വാതിൽ നാട്ടുകാർ വെട്ടിപ്പൊളിച്ചാണ് രക്ഷപ്പെടുത്തിയത്.

പരിക്കേറ്റ തേവലപ്പറമ്പ് ഷീജാഭവനിൽ ഓമന (64), പാങ്ങോട് വലിയവിള തെക്കേപുറത്ത് വീട്ടിൽ സുരേഷ് (54), തേവലപ്പുറം സുധീഷ് ഭവനത്തിൽ ശ്രീദേവി (54), കുന്നത്തൂർ ആതിര നിവാസിൽ ശങ്കരൻ കുട്ടി എന്നിവരെ തിരുവനന്തപുരം മെഡിക്കൽ കോളജ് ആശുപത്രിയിലും ബസ് ഡ്രൈവർ അജയകുമാർ (49), മൈനാഗപള്ളി മഹീൻ ഭവനിൽ മധുസുദനൻപിള്ള (59), ഉഷാകുമാരി (49), മിഥുൻ (24), മഹീൻ (26), മാവടി അരുൺനിവാസിൽ അനീഷ് കുമാർ (36), പുലമൺ രതീഷ് ഭവനത്തിൽ രതീഷ് കുമാർ (48), കരിമ്പിൻ പുഴ ലീല വിലാസത്തിൽ ഷീല (57), ആനകോട്ടൂർ അന്തനാട് വീട്ടിൽ ദേവരാജൻ (62), പെരുംകുളം കരോട്ടു വീട്ടിൽ രാജശേഖരൻ പിള്ള (60), ഭരണിക്കാവ് പനങ്കാട് കിഴക്കതിൽ പങ്കജ് (12), പവൻ (14), ആയൂർ ഗീതാലയത്തിൽ ലതിക (62), ആയൂർ തെക്കേവിള വീട്ടിൽ ഉഷാകുമാരി, പുത്തനമ്പലം കുഴിയംതാനത്ത് പുത്തൻ വീട്ടിൽ ബാലകൃഷ്ണപിള്ള (70), അഞ്ചൽ ചന്തമുക്ക് സ്വദേശി ജുനൈദ് (51), ശൂരനാട് സജിത്ത് ഭവനത്തിൽ സരിത, ശ്യാമള, ഓടനാവട്ടം പാലാ കരിക്കത്ത് വീട്ടിൽ മോഹനൻ (63), പുത്തൂർ അരുമകോണം അലിൻ (21), അനീഹ (15), പാങ്ങോട് പത്മവിലാസം കൃഷ്ണ കുമാർ (58), പത്തടി നൂറുൽ ഹുസൈൻ (20), റബിയുൽ റഹ്മാൻ (24), കുടവട്ടൂർ പ്രസൂഹത്തിൽ വസന്തകുമാരി, തൃക്കണ്ണാപുരം ലക്ഷ്മി ഭവനത്തിൽ ശ്യാമള (38), ശ്രാവൺ (13), സൗമ്യ (12), ശബരി (8), വിലങ്ങറ കലായ്കോട്ട് മേലതിൽ വത്സമ്മ (43) എന്നിവരെ കൊട്ടാരക്കര താലൂക്ക് ആശുപത്രിയിലും പ്രവേശിപ്പിച്ചു.

നിസ്സാര പരിക്കേറ്റവരെ പുത്തൂർ ബഥനി, എം.ജി.എം ആശുപത്രികളിൽ ചികിത്സ നൽകി. അപകടത്തിൽ കുടുംബമായി സഞ്ചരിച്ചിരുന്ന മധുസൂധനൻ പിള്ള, ഉഷാകുമാരി എന്നിവർക്ക് മുഖത്ത് സാരമായി പരിക്കേൽക്കുകയും മകൻ മിഥുന്റെ ഇടതു കൈക്ക് ഒടിവും സംഭവിച്ചു.നിർമ്മാല്യം ബസ് സമയംവൈകിയും അമിതവേഗതയിലായതുമാണ് അപകടകാരണമെന്ന് പരിക്കേറ്റ അതേ ബസിലെ യാത്രക്കാർ പറഞ്ഞു. ചുങ്കത്തറയ്ക്ക് സമീപം വളവിൽ അമിത വേഗതയിൽ മറ്റൊരു വാഹനത്തെ മറികടക്കാൻ ശ്രമിക്കുന്നതിനിടെ എതിരെ വന്ന സൊസൈറ്റി ബസിലിടിക്കുകയായിരുന്നു. അപകടത്തിൽപെടാതിരിക്കാൻ സൊസൈറ്റി ബസ് അരികിലേക്ക് മാറ്റിയെങ്കിലും ഡ്രൈവർ ഇരിക്കുന്ന ഭാഗത്തേക്ക് നിർമ്മാല്യം ബസ് ഇടിച്ചു കയറുകയും സൊസൈറ്റി ബസ് റോഡരികിലെ ഭിത്തിയിലേക്ക് ഇടിക്കുകയുമായിരുന്നു.

അപകടസമയം അത് വഴി വന്ന കാറുകാരനാണ് നിരവധി തവണ ആൾക്കാരെ ആശുപത്രിയിൽ എത്തിച്ചതെന്ന് യാത്രക്കാർ പറഞ്ഞു. അപകടസ്ഥലത്തേക്ക് ആംബുലൻസ് എത്താൻ വൈകിയെന്നും ആരോപണമുണ്ട്. പുത്തൂർ പൊലീസ് കേസെടുത്തു. പരിക്കേറ്റ് താലൂക്ക് ആശുപത്രിയിൽ ചികിത്സയിൽ കഴിയുന്നവരെ കെ.എൻ. ബാലഗോപാൽ എം.എൽ.എ, മുനിസിപ്പൽ ചെയർപേഴ്സൺ അനിത ഗോപകുമാർ, സ്ഥിരംസമിതി അധ്യക്ഷൻ എസ്.ആർ. രമേശ് തുടങ്ങിയവർ സന്ദർശിച്ചു.

കാ​ട്ടു​പോ​ത്ത് ഭീ​തി​യി​ൽ വി​ല​ങ്ങാ​ട്; മ​ല​യോ​ര​ത്ത് ജ​ന​രോ​ഷം പു​ക​യു​ന്നു

0

നാദാപുരം: കൃഷിയിടത്തിൽവെച്ച് യുവാവിനെ കാട്ടുപോത്ത് കുത്തിക്കൊന്ന സംഭവത്തിൽ വിലങ്ങാട് മലയോര മേഖലയിൽ ഭീതിയും പ്രതിഷേധവും പുകയുന്നു. വായാട് മലയിൽ മാസങ്ങളായി തമ്പടിച്ച കാട്ടുപോത്തുകളിലൊന്നിന്റെ ആക്രമണത്തിലാണ് വായാട് കോളനിയിലെ സുനിൽ കൊല്ലപ്പെട്ടത്. വനനിയമങ്ങളിലെ അശാസ്ത്രീയതയാണ് വന്യമൃഗശല്യം രൂക്ഷമാക്കുന്നതെന്നും നിയമത്തിൽ കാലോചിതമായ പരിഷ്കാരം വരുത്തി മനുഷ്യജീവനും സ്വത്തിനും സംരക്ഷണം ഉറപ്പാക്കണമെന്നും നാട്ടുകാർ ആവശ്യപ്പെട്ടു. കൃഷിയിടങ്ങളിലേക്ക് കടക്കാൻ പോലുമാകാത്ത സാഹചര്യമായതിനാൽ കൃഷി തന്നെ ഉപേക്ഷിക്കേണ്ട അവസ്ഥയിലാണ് കർഷകർ. അപകടകാരികളായ വന്യമൃഗങ്ങളെ നേരിടാനുള്ള അധികാരം ജനങ്ങൾക്ക് നൽകണമെന്നും നാട്ടുകാർ ആവശ്യപ്പെടുന്നു.കാട്ടുപോത്തിന്റെ ആക്രമണത്തിൽ കൊല്ലപ്പെട്ട സുനിലിന്റെ മൃതദേഹം പോസ്റ്റ്‌മോർട്ടം നടപടികൾക്ക് ശേഷം തറവാട് വീട്ടുവളപ്പിൽ സംസ്കരിച്ചു. സമൂഹത്തിന്റെ നാനാതുറകളിൽ നിന്നുള്ള വൻ ജനാവലിയാണ് അന്ത്യാഞ്ജലി അർപ്പിക്കാൻ എത്തിയത്. എം.എൽ.എ കെ.എം. അഭിജിത്, നരിപ്പറ്റ പഞ്ചായത്ത് പ്രസിഡൻറ് സുബിത, വാണിമേൽ പഞ്ചായത്ത് പ്രസിഡൻറ് കെ.പി. പ്രദീഷ്, ജില്ല പഞ്ചായത്ത് വൈസ് പ്രസിഡൻറ് കെ.കെ. നവാസ്, വാർഡ് മെംബർമാരായ ലൗലി, സെബി സെബാസ്റ്റ്യൻ, ബി.ജെ.പി ജില്ല പ്രസിഡന്റ് പ്രഫുൽ കൃഷ്ണ, കെ.പി. രാജീവൻ, രാജു അലക്സ്, വടകര തഹസിൽദാർ പ്രജീഷ് കുമാർ, ആർ.ഡി.ഒ പ്രസിൽ, നാദാപുരം ഡിവൈ.എസ്.പി തുടങ്ങിയവർ സംസ്കാര ചടങ്ങുകളിൽ പങ്കെടുത്തു.

ഓപ്പറേഷൻ തൂഫാൻ: 10 കോടിയിലധികം വിലമതിക്കുന്ന ലഹരിമരുന്നുമായി 3 പേർ പിടിയിൽ

0

​മലപ്പുറം: സംസ്ഥാന പോലീസ് ചരിത്രത്തിലെ ഏറ്റവും വലിയ എംഡിഎംഎ (MDMA) വേട്ടയിലൂടെ അന്തർസംസ്ഥാന ലഹരിമരുന്ന് കടത്ത് ശൃംഖലയ്ക്ക് കനത്ത തിരിച്ചടി നൽകി മലപ്പുറം ജില്ലാ പോലീസ്. 10 കോടിയിലധികം രൂപ വിപണിവില വരുന്ന 12.794 കിലോഗ്രാം എംഡിഎംഎയാണ് പ്രത്യേക അന്വേഷണ സംഘം പിടിച്ചെടുത്തത്. സംഭവവുമായി ബന്ധപ്പെട്ട് മൂന്ന് പേരെ കോയമ്പത്തൂരിൽ നിന്ന് പോലീസ് അറസ്റ്റ് ചെയ്തു.​മലപ്പുറം പന്തല്ലൂർ സ്വദേശി ജാബിർ അലി (32), വയനാട് മേപ്പാടി സ്വദേശി സാലിഹ് (34), മലപ്പുറം ആനക്കയം സ്വദേശി ഷെയിം അക്ബർ (21) എന്നിവരാണ് പിടിയിലായത്.​മലപ്പുറം ജില്ലാ പോലീസ് മേധാവി ചൈത്ര തെരേസ ജോൺ IPS-ന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് ഈ വൻ ലഹരിവേട്ടയ്ക്ക് പിന്നിൽ. ആഴ്ചകൾക്ക് മുൻപ് മഞ്ചേരി ടൗണിലെ സ്വകാര്യ അപ്പാർട്ട്മെന്റിൽ നിന്ന് 97.71 ഗ്രാം എംഡിഎംഎയുമായി ആറുപേരെ പോലീസ് അറസ്റ്റ് ചെയ്തിരുന്നു. ഈ കേസിനെക്കുറിച്ച് നടത്തിയ വിശദമായ അന്വേഷണമാണ് മറ്റ് സംസ്ഥാനങ്ങളിലേക്ക് വരെ വ്യാപിച്ചുകിടക്കുന്ന വലിയ ലഹരിക്കടത്ത് ശൃംഖലയെക്കുറിച്ചുള്ള നിർണായക വിവരങ്ങൾ പുറത്തുകൊണ്ടുവന്നത്.​ഡൽഹി, മുംബൈ, ബെംഗളൂരു എന്നിവിടങ്ങളിൽ നിന്ന് വൻതോതിൽ ലഹരിവസ്തുക്കൾ ശേഖരിച്ച് കോയമ്പത്തൂർ, പഴനി, കൊടൈക്കനാൽ കേന്ദ്രങ്ങളാക്കി കേരളത്തിലേക്ക് കടത്തുകയായിരുന്നു ഇവരുടെ രീതി. അന്വേഷണം ശക്തമാക്കിയതോടെ കോയമ്പത്തൂരിന് സമീപം വച്ച് ഇന്നോവ വാഹനത്തിന്റെ ഡോർ പാനലുകൾക്കുള്ളിൽ പ്രത്യേകമായി ഒളിപ്പിച്ച നിലയിലാണ് എംഡിഎംഎ കണ്ടെത്തിയത്. 100 മുതൽ 500 ഗ്രാം വരെ തൂക്കമുള്ള വിവിധ പാക്കറ്റുകളിലാക്കിയാണ് ലഹരി സൂക്ഷിച്ചിരുന്നത്.​ലഹരിവിരുദ്ധ പ്രവർത്തനങ്ങളുടെ ഭാഗമായി നടപ്പിലാക്കുന്ന ‘ഓപ്പറേഷൻ തൂഫാൻ’ പദ്ധതിയുടെ ഭാഗമായാണ് ഈ ചരിത്രപരമായ നേട്ടം പോലീസ് കൈവരിച്ചത്.

ഇഴ‌ഞ്ഞിഴഞ്ഞ് കോഴിക്കോട് റെയിൽവേ സ്റ്റേഷൻ വികസനം; കരാർ കാലാവധി 2027, നവീകരണം 21 %.

0

കോഴിക്കോട് : കരാർ കാലാവധി കഴിയാൻ 10 മാസം മാത്രം ബാക്കിയിരിക്കെ കോഴിക്കോട് റെയിൽവേ സ്റ്റേഷൻ പുനർവികസന പദ്ധതി നിശ്ചയിച്ച സമയത്തിനകം പൂർത്തിയാകില്ലെന്ന് ഉറപ്പായി. 445.95 കോടി പദ്ധതിയുടെ 36 മാസത്തെ കരാർ കാലാവധി 2027 ജൂൺ ഒന്നിന് അവസാനിക്കും. ഇതുവരെ 21 ശതമാനം നവീകരണ പ്രവൃത്തിയാണ് പൂർത്തിയായത്. നിലവിലെ നിർമ്മാണ വേഗം കണക്കിലെടുത്താൽ നവീകരണം പൂർത്തിയാകാൻ ഒരു വർഷം കൂടി അധികസമയം വേണ്ടിവന്നേക്കും.പദ്ധതിക്ക് വേണ്ടത്ര വേഗം പോരെന്ന് വിലയിരുത്തിയ റെയിൽവേ കരാറെടുത്ത റാങ്ക് പ്രൊജക്ട്സ് ആൻഡ് ഡെവലപ്മെന്റ് പ്രൈവറ്റ് ലിമിറ്റഡ്-വൈ. എഫ്. സി പ്രൊജക്ട്സ് പ്രൈവറ്റ് ലിമിറ്റഡ് കമ്പനികളെ മാറ്റുന്നതടക്കമുള്ള നടപടികൾ ആലോചിച്ചെങ്കിലും എങ്ങുമെത്തിയില്ല. നിർമാണ ഘട്ടത്തിൽ ഗുരുതരമായ വീഴ്ചകൾ കണ്ടെത്തിയതിനെ തുടർന്ന് ദക്ഷിണ റെയിൽവേ അധികൃതർ കരാർ കമ്പനിക്ക് അന്ത്യശാസനം നൽകുകയും ചെയ്തിരുന്നു. പദ്ധതി പ്രദേശത്ത് ആവശ്യത്തിന് തൊഴിലാളികളെ വിന്യസിക്കാത്തതും നിർമാണ സാമഗ്രികളുടെ ലഭ്യതക്കുറവുമാണ് പദ്ധതി വൈകുന്നതിന് പ്രധാന കാരണമായി ചൂണ്ടിക്കാട്ടുന്നത്.

2024 മേയ് 17നാണ് റാങ്ക് പ്രൊജക്ട്സ് ആൻഡ് ഡെവലപ്മെന്റ് പ്രൈവറ്റ് ലിമിറ്റഡ്-വൈ. എഫ്. സി പ്രൊജക്ട്സ് പ്രൈവറ്റ് ലിമിറ്റഡ് സംയുക്ത സംരംഭത്തിന് പദ്ധതിയുടെ കരാർ നൽകിയത്. 36 മാസമായിരുന്നു കാലാവധി. 2024 ജൂൺ ഒന്നിന് നിർമാണ പ്രവർത്തനങ്ങൾ ആരംഭിച്ചെങ്കിലും ഒച്ചിഴയും വേഗതയാണ്. റെയിൽവേ ഹെൽത്ത് യൂണിറ്റിന്റെ ഘടന പൂർത്തിയായിട്ടുണ്ട്. ഫിനിഷിംഗ് ജോലികൾ പുരോഗമിക്കുകയാണ്. ജീവനക്കാരുടെ ക്വാർട്ടേഴ്സിന്റെ അഞ്ച് ബ്ലോക്കുകളിൽ മൂന്ന് ബ്ലോക്കുകളുടെ ഒന്നാം നില സ്ലാബ് പൂർത്തിയായി. ഒരു ബ്ലോക്കിൽ ഗ്രൗണ്ട് ഫ്ലോർ കോളങ്ങളുടെയും മറ്റൊന്നിൽ പൈലിങ്ങിന്റെയും ജോലികളാണ് നടക്കുന്നത്.പടിഞ്ഞാറുഭാഗത്തെ ബഹുനില വാഹന പാർക്കിംഗ് കേന്ദ്രത്തിന്റെ നാല് നിലകളുടെ സൂപ്പർ സ്ട്രക്ചർ പൂർത്തിയായി. കിഴക്കുഭാഗത്തെ പാർക്കിംഗ് കേന്ദ്രത്തിന്റെ മൂന്ന് നിലകളുടെ നിർമാണവും നാലാം നിലയുടെ പകുതി ജോലികളും പൂർത്തിയായിട്ടുണ്ട്.

കിഴക്ക്, പടിഞ്ഞാറ് ടെർമിനൽ കെട്ടിടങ്ങളുടെ പൈലിംഗ് പൂർത്തിയായെങ്കിലും പടിഞ്ഞാറ് ടെർമിനലിൽ പൈൽ ക്യാപ് നിർമാണമാണ് പുരോഗമിക്കുന്നത്. റെയിൽവേ ഓഫീസ് കെട്ടിടത്തിന്റെ പൈലിംഗ് ജോലികളും നടക്കുന്നു.പദ്ധതിയിലെ പ്രധാന ഘടകങ്ങളായ 24 മീറ്റർ വീതിയുള്ള എയർ കോൺകോഴ്സിന്റെയും രണ്ട് 12 മീറ്റർ വീതിയുള്ള ഫുട് ഓവർ ബ്രിഡ്ജുകളുടെയും ഡിസൈൻ ജോലികളും വെൻഡർ അന്തിമീകരണവും പുരോഗമിക്കുകയാണ്. ബഹുനില വാഹന പാർക്കിംഗ് കേന്ദ്രം, പൊതുറോഡുകൾ, ലൈറ്റ് മെട്രോ സ്റ്റേഷൻ തുടങ്ങിയവയെ ബന്ധിപ്പിക്കുന്ന ആറ് മീറ്റർ വീതിയുള്ള സ്കൈവാക്കുകളും പദ്ധതിയുടെ ഭാഗമാണ്. 24 ലിഫ്റ്റുകൾ, 17 എസ്കലേറ്ററുകൾ, വിശാലമായ കാത്തിരിപ്പ് കേന്ദ്രങ്ങൾ, വാണിജ്യ സ്റ്റാളുകൾ, ഹോട്ടലുകൾ, റസ്റ്റോറന്റുകൾ എന്നിവയും പദ്ധതിയിൽ വരും.

ടിക്കറ്റുണ്ട്, സീറ്റില്ല, ബസുമില്ല! കോഴിക്കോട് കെ.എസ്.ആർ.ടി.സിയിൽ യാത്രക്കാരുടെ പ്രതിഷേധം.

0

കോഴിക്കോട്: ടിക്കറ്റ് ബുക്ക് ചെയ്ത് കൃത്യസമയത്ത് ബസ് ടെർമിനലിലെത്തിയ യാത്രക്കാർക്ക് കിട്ടിയത് അമ്പരപ്പിക്കുന്ന മറുപടി. ‘നിങ്ങൾ ബുക്ക് ചെയ്ത ബസ് സർവീസ് തന്നെയില്ല’. കോഴിക്കോട് മാവൂർ റോഡിലെ കെ.എസ്.ആർ.ടി.സി ടെർമിനലിൽ ഇന്നലെ രാത്രി 15ഓളം യാത്രക്കാരാണ് ഇതോടെ പെരുവഴിയിലായത്.രാത്രി 11.05ന് കോഴിക്കോട് നിന്ന് തിരുവനന്തപുരത്തേക്ക് പുറപ്പെടേണ്ടിയിരുന്ന സൂപ്പർ ഫാസ്റ്റ് ബസിലേക്കാണ് യാത്രക്കാർ ഓൺലൈനായും നേരിട്ടും ടിക്കറ്റ് എടുത്തിരുന്നത്. ബസിൽ കയറിയപ്പോഴാണ് പ്രശ്നം പുറത്തായത്. യാത്രക്കാർ ബുക്ക് ചെയ്ത സീറ്റുകളിലെല്ലാം മറ്റ് യാത്രക്കാർ ഇരിക്കുകയായിരുന്നു.സംഭവം കണ്ടക്ടറുടെ ശ്രദ്ധയിൽപ്പെടുത്തിയ ശേഷം യാത്രക്കാർ ഓൺലൈൻ ടിക്കറ്റുകളും കാണിച്ചു. എന്നാൽ അത്തരമൊരു സർവീസ് നടത്തുന്നില്ലെന്നും ടിക്കറ്റ് ലഭിച്ചത് സാങ്കേതിക പിഴവ് മൂലമാകാമെന്നുമായിരുന്നു അധികൃതരുടെ വിശദീകരണം.

ഇതോടെ യാത്രക്കാർ പ്രതിഷേധിച്ചു. ടിക്കറ്റ് തുക തിരിച്ചുനൽകാമെന്ന അധികൃതരുടെ നിർദേശവും അവർ അംഗീകരിച്ചില്ല. ഓണാവധി കഴിഞ്ഞ് മടങ്ങുന്ന വിദ്യാർഥികൾ ഉൾപ്പെടെയുള്ളവർക്ക് എങ്ങനെയും ലക്ഷ്യസ്ഥാനത്ത് എത്താനുള്ള ബദൽ യാത്രാസൗകര്യം ഒരുക്കണമെന്നായിരുന്നു ആവശ്യം.പ്രതിഷേധം ശക്തമായതോടെ പൊലീസ് ടെർമിനലിലെത്തി. ഒടുവിൽ രാത്രി 12.15ഓടെ മുഴുവൻ യാത്രക്കാർക്കും മറ്റൊരു ബസിൽ യാത്രാസൗകര്യം ഒരുക്കി. സർവീസ് ഇല്ലാത്ത ബസിന് എങ്ങനെ ടിക്കറ്റ് ബുക്ക് ചെയ്യാനായി എന്ന് കണ്ടെത്താൻ കെ.എസ്.ആർ.ടി.സി അന്വേഷണം ആരംഭിച്ചു.

വേർതിരിവിന്റെ മതിൽ പൊളിക്കുന്നു; ഈ രണ്ട് സ്കൂളുകൾ ഒന്നാകും: സർക്കാരിന് പ്രതിവർഷം 48 ലക്ഷം രൂപ ലാഭിക്കാം.

0

ബാലുശ്ശേരി : അടുത്ത അധ്യയന വർഷം മുതൽ ഒറ്റ സ്കൂൾ. ബാലുശ്ശേരി ഗവ. എച്ച്എസ്എസും ഗവ. വൊക്കേഷനൽ എച്ച്എസ്എസും ലയിപ്പിച്ച് സർക്കാർ ഉത്തരവായി. അടുത്ത അധ്യയന വർഷം മുതലാണ് ഉത്തരവ് പ്രാബല്യത്തിൽ വരിക. 1982ൽ ബാലുശ്ശേരി ഗവ. ഹൈസ്കൂൾ വിഭജിച്ചാണ് ഗേൾസ്, ബോയ്സ് സ്കൂളുകൾ തുടങ്ങിയത്. വലിയ മതിൽ നിർമിച്ച് രണ്ട് സ്കൂളുകളെയും വേർതിരിച്ചു. ഒരു മതിലിന് അപ്പുറവും ഇപ്പുറവുമായി പ്രവർത്തിക്കുന്ന സ്കൂളുകളിൽ പിന്നീട് പുതിയ കോഴ്സുകൾ ആരംഭിക്കുകയും ചെയ്തു.ഏതാനും വർഷം മുൻപ് സർക്കാർ ഉത്തരവ് വന്നതോടെ ആൺ, പെൺ വേർതിരിവ് പേരിൽ നിന്നു മാറ്റി എല്ലാവർക്കും പ്രവേശനം നൽകിത്തുടങ്ങി. ഒരു സ്ഥലത്ത് രണ്ട് സ്കൂളുകളായി പ്രവർത്തിക്കുന്നതിന്റെ പ്രശ്നങ്ങൾ മനസ്സിലാക്കിയതോടെയാണ് ഒരു സ്കൂളാക്കി മാറ്റി എല്ലാ സൗകര്യങ്ങളും വിദ്യാർഥികൾക്ക് ഉപയോഗിക്കാൻ അവസരം ഉണ്ടാകണമെന്ന ആവശ്യം ശക്തമായത്.ജിജിഎച്ച്എസ്എസിൽ മികച്ച ലാബ് സൗകര്യങ്ങൾ ഉള്ളപ്പോൾ കളി സ്ഥലം ജിവിഎച്ച്എസ്എസിനു മാത്രമാണുള്ളത്. ലയനം പൂർണമാകുന്നതോടെ പഠനത്തിനും പാഠ്യേതര പ്രവർത്തനങ്ങൾക്കും കൂടുതൽ സൗകര്യങ്ങൾ ലഭിക്കും. സ്കൂളുകൾ ഏകീകരിക്കുമ്പോൾ പ്രതിവർഷം സർക്കാരിന് 48 ലക്ഷം രൂപ ലാഭിക്കാൻ കഴിയും. ഒരു പ്രധാനാധ്യാപകൻ ഉൾപ്പെടെ വിവിധ തസ്തികകളിൽ കുറവ് വരും.സ്കൂളുകളെ ലയിപ്പിക്കണമെന്ന് ആവശ്യപ്പെട്ട് 2023ൽ സർവോദയം ട്രസ്റ്റ് ചെയർമാനായിരുന്ന കെ.പി.മനോജ് കുമാർ നവ കേരള സദസ്സിൽ മുഖ്യമന്ത്രിക്ക് നിവേദനം നൽകിയിരുന്നു. സ്കൂളുകളെ ലയിപ്പിക്കുന്നതിനായി പിടിഎയും ജില്ലാ പഞ്ചായത്തും പ്രമേയം പാസാക്കിയിരുന്നു. ഈ ആവശ്യം അംഗീകരിച്ചു കിട്ടുന്നതിനായി മുൻ എംഎൽഎ കെ.എം.സച്ചി‍ൻദേവും വി.ടി.സൂരജ് എംഎ‍ൽഎയും സർക്കാർ തലത്തിൽ ഇടപെടലുകൾ നടത്തി.താമരശ്ശേരി വിദ്യാഭ്യാസ ജില്ലാ ഓഫിസറായിരുന്ന കെ.കെ.സുബൈർ കൃത്യമായി ഈ വിഷയത്തിൽ ഇടപെട്ട് സർക്കാരിനു റിപ്പോർട്ട് നൽകിയിരുന്നു. അന്ന് ജിഎച്ച്എസിലെ അധ്യാപകനായിരുന്ന യു.കെ.ഷജിലാണ് റിപ്പോർട്ട് തയാറാക്കിയത്. ലയനത്തോടെ അധികം വരുന്ന തസ്തികകളിൽ ഉള്ളവരെ പുനർവിന്യസിക്കും.

ഓണാവധിക്ക് ശേഷം സംസ്ഥാനത്തെ സ്‌കൂളുകള്‍ നാളെ തുറക്കും.

0

തിരുവനന്തപുരം : ഓണാവധിക്ക് ശേഷം സംസ്ഥാനത്തെ സ്‌കൂളുകള്‍ നാളെ തുറക്കും. സ്‌കൂള്‍ തുറക്കുന്നതിനോടൊപ്പം നേരത്തെ മാറ്റിവെച്ച ഒന്നാം പാദവാര്‍ഷിക പരീക്ഷയും നടക്കും. ആഗസ്ത് 21ന് നടക്കേണ്ട എട്ടാം ക്ലാസ് പരീക്ഷയാണ് നടക്കുക. പരീക്ഷ സെപ്തംബര്‍ ഒന്നിന് നടത്താനാണ് തീരുമാനം. ആഗസ്ത് 14 മുതല്‍ 20 വരെയായിരുന്നു ഓണപ്പരീക്ഷകള്‍. ആഗസ്ത് 22 മുതലായിരുന്നു സ്‌കൂളുകള്‍ക്ക് അവധി നല്‍കിയിരുന്നത്. ഒന്‍പത് ദിവസം മാത്രമാണ് ഈ വര്‍ഷം വിദ്യാര്‍ഥികള്‍ക്ക് അവധി നല്‍കിയത്. തുടക്കത്തില്‍ ആഗസ്ത് 21 ന് ഓണാഘോഷ പരിപാടികള്‍ നടക്കുന്ന ദിവസം പരീക്ഷ നടത്താനായിരുന്നു വിദ്യാഭ്യാസ വകുപ്പിന്റെ തീരുമാനം. എന്നാല്‍ സ്‌കൂളുകളിലെ ഓണാഘോഷ ദിവസം പരീക്ഷ നടത്തുന്നതിനെതിരെ വിദ്യാര്‍ഥികളും അധ്യാപകരും വിമര്‍ശനവുമായി രംഗത്തെത്തി. കുട്ടികള്‍ക്ക് ഓണാഘോഷത്തിന് അവസരമൊരുക്കണമെന്ന് ആവശ്യപ്പെട്ട് കെഎസ്ടിഎ വിദ്യാഭ്യാസമന്ത്രിക്ക് നിവേദനം നല്‍കുകയും ചെയ്തു. തുടര്‍ന്നാണ് പരീക്ഷ മാറ്റിയത്.

കാട്ടുപോത്തിന്റെ ആക്രമണത്തിൽ യുവാവ് മരിച്ച സംഭവം: കാട്ടുപോത്തിനെ വെടിവെച്ചു കൊല്ലാൻ ഉത്തരവിറക്കും

കോഴിക്കോട്: വിലങ്ങാട് കാട്ടുപോത്തിന്റെ ആക്രമണത്തിൽ യുവാവ് മരിച്ച സംഭവത്തിൽ കാട്ടുപോത്തിനെ വെടിവെച്ചു കൊല്ലാൻ ഉത്തരവിറക്കും. ഇത് സംബന്ധിച്ച് ഡിഎഫ്ഒ കളക്ടർക്ക് റിപ്പോർട്ട് സമർപ്പിച്ചു. കളക്ടർ മുകളിലേക്ക് ഉത്തരവ് കൈമാറിയിട്ടുണ്ട്. കാട്ടുപോത്തിൻ്റെ മരിച്ച സുനിലിന്റെ കുടുംബത്തിനുള്ള നഷ്ടപരിഹാരത്തുകയുടെ ആദ്യ ഗഡു ഉടൻ നൽകും. കുടുംബം തയ്യാറാണെങ്കിൽ ആദ്യ ഗഡു ഇന്ന് തന്നെ നൽകും. ഫെൻസിംഗ് പൂർത്തിയാക്കുന്ന നടപടികൾ ഉണ്ടാകുമെന്നാണ് അധികൃതർ അറിയിച്ചിരുന്നു.ശനിയാഴ്ചയായിരുന്നു വിലങ്ങാട് വായാട് ഉന്നതിയിൽ കാട്ടുപോത്തിന്റെ ആക്രമണത്തിൽ സുനിൽ കൊല്ലപ്പെട്ടത്. ജനവാസ മേഖലയിൽ ഇറങ്ങിയ കാട്ടുപോത്തിനെ ഓടിക്കാനുള്ള ശ്രമത്തിനിടെ പോത്ത് തിരിഞ്ഞുവന്ന് സുനിലിനെ ആക്രമിക്കുകയായിരുന്നു. ആക്രമണത്തിൽ സുനിലിന് സാരമായ പരിക്കേറ്റിരുന്നു. ഉടൻ തന്നെ സുനിലിനെ കുറ്റ്യാടി താലൂക്ക് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.സുനിലിന്റെ മരണത്തിന് പിന്നാലെ നാട്ടുകാർ പ്രതിഷേധിച്ചിരുന്നു. ഡിഎഫ്ഒയെ തടഞ്ഞുവെച്ചായിരുന്നു പ്രതിഷേധം. ഇതിന് പിന്നാലെ കെ എം അഭിജിത്ത് എംഎൽഎയും പഞ്ചായത്ത് പ്രസിഡന്റും അടക്കം സ്ഥലത്തെത്തുകയും നാട്ടുകാരുമായി ചർച്ച നടത്തുകയും ചെയ്തു. തുടർന്നാണ് നാട്ടുകാർ പ്രതിഷേധം അവസാനിപ്പിച്ചത്. നഷ്ടപരിഹാരം സംബന്ധിച്ച് ജില്ലാ കളക്ടറുമായി ഇന്ന് ചർച്ച നടക്കുന്നുണ്ട്. ഇതിൽ തീരുമാനമായില്ലെങ്കിൽ സമരം തുടരാനാണ് നാട്ടുകാരുടെ തീരുമാനം. സുനിലിന്റെ മൃതദേഹം പോസ്റ്റ്‌മോർട്ടം നടപടികൾക്ക് ശേഷം ശനിയാഴ്ച രാത്രിയോടെ ബന്ധുക്കൾക്ക് വിട്ടുനൽകിയിരുന്നു. സംസ്‌കാരം ഇന്ന് വീട്ടുവളപ്പിൽ നടക്കും.

മലബാറിന്റെ ഗവി: മനംകവർന്ന് വയലട; സഞ്ചാരികളുടെ പ്രിയകേന്ദ്രമാകുന്നു

0

കോഴിക്കോട് : പ്രകൃതിസൗന്ദര്യത്താൽ സമൃദ്ധമായ കോഴിക്കോട് ജില്ലയിലെ ബാലുശ്ശേരിക്ക് സമീപമുള്ള വയലട വിനോദസഞ്ചാരികളുടെ ശ്രദ്ധയാകർഷിക്കുന്നു. സമുദ്രനിരപ്പിൽ നിന്ന് രണ്ടായിരത്തിലധികം അടി ഉയരത്തിൽ സ്ഥിതി ചെയ്യുന്ന ഈ മലമ്പ്രദേശം ‘മലബാറിന്റെ ഗവി’ എന്ന പേരിലാണ് അറിയപ്പെടുന്നത്. കോഴിക്കോട് നഗരത്തിൽ നിന്ന് ഏകദേശം 45 കിലോമീറ്റർ സഞ്ചരിച്ചാൽ ഇവിടെ എത്തിച്ചേരാം.​കുളിർകാറ്റും കോടമഞ്ഞും പച്ചപ്പുനിറഞ്ഞ കുന്നുകളുമാണ് വയലടയുടെ പ്രധാന ആകർഷണം. ബാലുശ്ശേരി, കുറുമ്പൊയിൽ വഴിയുള്ള യാത്രയിൽ റബ്ബർ തോട്ടങ്ങളും നാട്ടിൻപുറ കാഴ്ചകളും പിന്നിട്ട് വളഞ്ഞുപുളഞ്ഞ റോഡുകളിലൂടെ വയലടയിലേക്ക് കയറുമ്പോൾ തന്നെ പ്രദേശത്തിന്റെ കാലാവസ്ഥ മാറിത്തുടങ്ങും. പശ്ചിമഘട്ട മലനിരകളുടെ പനോരമിക് കാഴ്ചയും പച്ചപുതച്ച താഴ്‌വരകളും ഇവിടെയെത്തുന്നവർക്ക് വേറിട്ട അനുഭവമാണ് സമ്മാനിക്കുന്നത്.​മഴക്കാലത്താണ് വയലട കൂടുതൽ മനോഹരമാകുന്നത്. മഞ്ഞും മഴമേഘങ്ങളും താഴ്‌വരകളെ പുതയ്ക്കുന്ന കാഴ്ച കാണാൻ നിരവധി ആളുകളാണ് ദിവസവും ഇവിടെയെത്തുന്നത്. ദൂരയാത്രകൾ ഒഴിവാക്കി പ്രകൃതിയോടിണങ്ങി കുറച്ചുസമയം ചെലവഴിക്കാൻ ആഗ്രഹിക്കുന്നവർക്ക് അനുയോജ്യമായ ഇടമാണ് വയലട.