കോഴിക്കോട് : പന്തീരാങ്കാവ് ടോൾ പ്ലാസയിൽ വൻ തട്ടിപ്പ്. ജീവനക്കാർ 7 ലക്ഷം തട്ടി. സ്വകാര്യസ്ഥാപനത്തിന്റെ ക്യുആര് സ്കാനർ സ്ഥാപിച്ചായിരുന്നു തട്ടിപ്പ്. പന്തീരാങ്കാവ് പൊലീസ് കേസെടുത്തു. കേസിൽ 6 പ്രതികളുണ്ട്. ഉത്തർപ്രദേശ് സ്വദേശികളായ ഉമാശങ്കര്, മോണ്ടി രാജ്പുത്, ഹരിമോഹൻ, ശിം, നവീൻസിങ് ഭദോരിയ എന്നിവരാണ് പ്രതികൾ. ഇതിൽ ഒന്നാം പ്രതിയായ ബിപിൻ രാജ്പുത്തിനെ പന്തിരാങ്കാവ് പൊലീസ് കസ്റ്റഡിയിൽ എടുത്തിട്ടുണ്ട്. സെപ്തംബര് 2 മുതൽ ഒക്ടോബര് 5 വരെയുള്ള കാലയളവിലാണ് തട്ടിപ്പ് നടന്നത്. എസ്ഐ എൻ. രാജ്കുമാറിനാണ് അനേഷണച്ചുമതല. ഒളവണ്ണ ടോൾ പ്ലാസയിലെ ടോൾ പിരിവ് പണം ഒന്നാം പ്രതിയുടെ നിർദേശപ്രകാരം ക്യൂആര് സ്കാനർ വഴി സ്വകാര്യ അക്കൗണ്ടുകളിലേക്ക് മാറ്റി കമ്പനിക്ക് ഏഴ് ലക്ഷം രൂപയുടെ നഷ്ടം വരുത്തിയതായി പരാതിയിൽ പറയുന്നു. അമിത് കുമാർ ശർമ എന്നയാളാണ് പന്തീരാങ്കാവ് പൊലീസ് സ്റ്റേഷനിൽ പരാതി നൽകിയത്. ഫാസ്റ്റ് ടാഗ് ഇല്ലാത്ത വാഹനങ്ങൾ കടന്നുപോകുമ്പോൾ ജീവനക്കാർ സ്വന്തം നിലയിലുള്ള ക്യുആർ കോഡ് സ്കാനർ കാണിച്ചു കൊടുക്കുകയും, അതിലൂടെ ലഭിക്കുന്ന പണം കമ്പനിയുടെ അക്കൗണ്ടിലേക്ക് പോകാതെ പ്രതികളുടെ സ്വകാര്യ അക്കൗണ്ടുകളിലേക്ക് മാറ്റുകയുമായിരുന്നു. ടോൾ പ്ലാസയിലെ മാനേജർ നടത്തിയ പരിശോധനയിലാണ് വലിയ തോതിലുള്ള ഈ തട്ടിപ്പ് പുറത്തുവന്നതും തുടർന്ന് പൊലീസിൽ പരാതി നൽകിയതും.
മദ്യം വേണം: ആദ്യം വിദ്യാർഥികൾ യൂണിഫോമിൽ എത്തി, പിന്നീട് യൂണിഫോം മാറ്റി എത്തി, ശേഷം ആളെ വിട്ടു; നൽകാത്തതിന് ബവ്റിജസില് തർക്കം
കോഴിക്കോട് : കക്കോടി പാലത്തിനു സമീപത്തെ ബവ്റിജസ് കോർപറേഷന്റെ ഔട്ട്ലെറ്റിൽ മദ്യം വാങ്ങാനെത്തിയ വിദ്യാർഥികളെ ജീവനക്കാർ മടക്കി അയച്ചു. ഇന്നലെ രാവിലെയാണ് സംഭവം. ആദ്യം യൂണിഫോമിൽ വിദ്യാർഥികളെത്തിയപ്പോൾ 23 വയസ്സ് പൂർത്തിയാകാത്തവർക്ക് മദ്യം നൽകില്ലെന്നു പറഞ്ഞാണ് മടക്കിയത്.പിന്നീട് ഇവർ യൂണിഫോം മാറ്റി സാധാരണ വസ്ത്രത്തിലെത്തി മദ്യം ചോദിച്ചു. ആദ്യം താഴെത്തെ നിലയിൽ പ്രീമിയം കൗണ്ടറിലെത്തി മദ്യം ചോദിച്ചു. 23 വയസ്സു പൂർത്തിയാകാത്തതിനാൽ മദ്യം നൽകില്ലെന്നതു ജീവനക്കാർ ആവർത്തിച്ചു. മടക്കി അയച്ചതോടെ മുകളിലത്തെ നിലയിലെത്തി കൗണ്ടറിൽ നിന്ന് മദ്യം ചോദിച്ചു. പറ്റില്ലെന്നു പറഞ്ഞതോടെ ജീവനക്കാരുമായി തർക്കമായി.ഇതിനിടെ താഴെ നിന്നിരുന്ന ചിലരെ മദ്യം വാങ്ങാനായി വിദ്യാർഥികൾ മുകളിലേക്ക് അയച്ചിരുന്നു. വിദ്യാർഥികൾ ചോദിച്ച അതേ ബ്രാൻഡാണ് ഇവർ ആവശ്യപ്പെട്ടത്. നിങ്ങൾ വിദ്യാർഥികൾക്ക് വേണ്ടി മദ്യം വാങ്ങാൻ വന്നതാണോയെന്നു ജീവനക്കാർ അവരോട് ചോദിച്ചു. അങ്ങനെയാണെങ്കിൽ കേസ് വരുമെന്നു പറഞ്ഞു അവരെയും പിന്തിരിപ്പിച്ചു. അതോടെ വിദ്യാർഥികൾ കൗണ്ടറിലെത്തി ജീവനക്കാരുമായി വാക്തർക്കം ഉണ്ടാക്കി. പൊലീസും സ്ഥലത്തെത്തി. സിസിടിവി ദൃശ്യങ്ങൾ പൊലീസ് പരിശോധിച്ചു.
തിങ്കളാഴ്ച അവധി പ്രഖ്യാപിച്ചേക്കും; സംസ്ഥാനത്ത് തുടർച്ചയായി നാലുദിവസം ലീവ്
തിരുവനന്തപുരം: സംസ്ഥാനത്ത് നവരാത്രി ആഘോഷങ്ങളുടെ ഭാഗമായി ഒക്ടോബർ 19 തിങ്കളാഴ്ച പൊതുഅവധി പ്രഖ്യാപിച്ചേക്കും. ഇതുസംബന്ധിച്ച ഔദ്യോഗിക ഉത്തരവ് ഉടൻ പുറത്തിറങ്ങുമെന്നാണ് സൂചന. ഇതോടെ സംസ്ഥാനത്ത് തുടർച്ചയായി നാല് ദിവസം അവധി ലഭിക്കും.നിലവിൽ ഒക്ടോബർ 20 ചൊവ്വാഴ്ച മഹാനവമി അവധിയും 21 ബുധനാഴ്ച വിജയദശമി അവധിയുമാണ്. 18 ഞായറാഴ്ച പൊതു അവധിയും. 19 തിങ്കളാഴ്ച നവരാത്രി അവധി കൂടിയാകുന്നതോടെ തുടർച്ചയായി നാലുദിവസമാണ് വിദ്യാലയങ്ങൾക്കടക്കം അവധി ലഭിക്കുക.സർക്കാർ, അർധസർക്കാർ, പൊതുമേഖലാ സ്ഥാപനങ്ങൾക്കും വിദ്യാഭ്യാസ സ്ഥാപനങ്ങൾക്കുമുള്ള അവധി ഔദ്യോഗിക ഉത്തരവിലെ വ്യവസ്ഥകൾ അനുസരിച്ചായിരിക്കും തീരുമാനിക്കുക. കേരള സർക്കാരിന്റെ ഔദ്യോഗിക കലണ്ടർ പ്രകാരം മഹാനവമി, വിജയദശമി ദിവസങ്ങളിൽ അവധിയുണ്ട്.
ജില്ലാ കായിക മേളക്ക് ഇന്ന് തുടക്കം.
കോഴിക്കോട്: പുതിയ വേഗവും ഉയരങ്ങളും കീഴടക്കാനുള്ള കൗമാരകരുത്തിന്റെ പോരാട്ടമായ ജില്ല സ്കൂൾ കായികമേളക്ക് വെള്ളിയാഴ്ച മെഡിക്കൽ കോളജ് ഒളിമ്പ്യൻ റഹ്മാൻ സ്റ്റേഡിയത്തിൽ തുടക്കമാവും. 17 ഉപജില്ലകളിൽനിന്നായി നാലായിരത്തിലധികം കുട്ടികൾ മേളയിൽ മാറ്റുരക്കും. മൂന്ന് ദിവസങ്ങളിലായി നടക്കുന്ന മേളക്ക് വെള്ളിയാഴ്ച രാവിലെ ഒമ്പതിന് വിദ്യാഭ്യാസ ഉപഡയറക്ടർ സി.എസ്. അമൃത പതാക ഉയർത്തും.മേയർ ഒ. സദാശിവൻ ഉദ്ഘാടനം ചെയ്യും. ആദ്യദിനം 100 മീറ്റർ മത്സരങ്ങൾക്കായി സബ് ജൂനിയർ, ജൂനിയർ, സീനിയർ വിഭാഗങ്ങളിലെ ആൺകുട്ടികളും പെൺകുട്ടികളും ട്രാക്കിലിറങ്ങും. 4×100 മീറ്റർ റിലേ മത്സരങ്ങളും 800 മീറ്റർ ഓട്ടമത്സരങ്ങളും വെള്ളിയാഴ്ച നടക്കും. ജൂനിയർ ആൺകുട്ടികൾ, ജൂനിയർ പെൺകുട്ടികൾ, സീനിയർ ആൺകുട്ടികൾ, സീനിയർ പെൺകുട്ടികൾ എന്നീ വിഭാഗങ്ങളിലാണ് മത്സരം.ട്രാക്കിനൊപ്പം ഫീൽഡ് ഇനങ്ങളിലും ഇന്ന് മത്സരങ്ങളുണ്ട്. സബ് ജൂനിയർ ആൺകുട്ടികളുടെയും സീനിയർ പെൺകുട്ടികളുടെയും ലോങ് ജംപ്, സബ് ജൂനിയർ പെൺകുട്ടികളുടെ ഹൈജംപ്, ജൂനിയർ, സീനിയർ ആൺകുട്ടികളുടെ ഹൈജംപ്, ഷോട്ട്പുട്ട്, ഹാമർ ത്രോ മത്സരങ്ങളും ആദ്യദിനം നടക്കും. കായികമേളയുടെ നടത്തിപ്പിനായി സംഘാടകസമിതിയുടെയും വിവിധ അധ്യാപക സംഘടനകളുടെയും നേതൃത്വത്തിൽ ഒരുക്കം പൂർത്തിയായി.ടി.എം. അബ്ദുറഹിമാൻ അനുസ്മരണ സംഘാടകസമിതിയുടെ ആഭിമുഖ്യത്തിൽ കായിക മേളയുടെ ദീപശിഖ പ്രയാണം ദേശീയ സ്വർണമെഡൽ ജേതാവും സംസ്ഥാന സ്പോർട്സ് കൗൺസിൽ അംഗവുമായിരുന്ന ടി.എം. അബ്ദുറഹിമാന്റെ ഖബറടത്തിൽനിന്ന് പുതുപ്പാടി ഗ്രാമപഞ്ചായത്ത് പ്രസിഡന്റ് ബിജു താന്നിക്കാക്കുഴി തെളിയിച്ച് ഉദ്ഘാടനം ചെയ്തു. ഏഷ്യൻ ഫുട്-വോളി ഫെഡറേഷൻ വൈ. പ്രസിഡന്റ് എ.കെ. മുഹമ്മദ് അഷറഫ് അധ്യക്ഷനായി. പുതുപ്പാടി ഗവ. ഹൈസ്കൂൾ കായികതാരങ്ങൾ ഈങ്ങാപ്പുഴയിൽനിന്ന് ഗവ. ഹൈസ്കൂളിലേക്ക് ദീപശിഖ പ്രയാണം സംഘടിപ്പിച്ചു. ഹെഡ്മാസ്റ്റർ ഈസ കോയ ദീപശിഖ ഏറ്റുവാങ്ങി. തുടർന്ന് ഈങ്ങാപ്പുഴ എം.ജി.എം ഹൈസ്കൂളിലെത്തിയ ദീപശിഖ കായികതാരങ്ങൾ ഏറ്റുവാങ്ങി. കായികമേള ഉദ്ഘാടന സമയത്ത് കോഴിക്കോട് ഒളിമ്പ്യൻ റഹ്മാൻ സ്റ്റേഡിയത്തിൽ ദീപശിഖ തെളിയിക്കും.
കാലവർഷക്കെടുതി: കോഴിക്കോടിന് 64.61 ലക്ഷം അനുവദിച്ചു.
കോഴിക്കോട്: 2026ലെ കാലവർഷക്കെടുതിയിൽ പ്രളയം മൂലം ദുരിതത്തിലായ കുടുംബങ്ങൾക്കും വീടുകൾക്ക് നാശനഷ്ടം സംഭവിച്ചവർക്കും സർക്കാർ ധനസഹായം അനുവദിച്ചു. ആകെ 64.61 ലക്ഷം രൂപയാണ് ദുരന്ത നിവാരണ വകുപ്പ് അനുവദിച്ചത്.ജില്ലയിലെ നാല് താലൂക്കുകളിലായി വെള്ളം കയറിയ വീടു കൾ വൃത്തിയാക്കുന്നതിനായി 1,094 ഗുണഭോക്താക്കൾക്ക് 5,000 രൂപ വീതം നൽകും. ഇതിനായി 54,70,000 രൂപ അനുവദിച്ചു. പ്രളയ ബാധിതർക്ക് വീടു കൾ വൃത്തിയാക്കാൻ റേഷൻ കാർഡ് ഒന്നിന് ആകെ 10,000 രൂപയാണ് ധനസഹായം നിശ്ചയിച്ചിട്ടുള്ളത്.ഇതിൽ എസ്ഡിആർഎഫ് വിഹിതമായ 5,000 രൂപയാണ് ഇപ്പോൾ അനുവദിച്ചത്. പ്രളയ ദുരിതബാധിതരായ 472 ഗുണഭോ ക്താക്കൾക്ക് ഒരു റേഷൻ കാർഡിന് (2 മുതിർന്ന വ്യക്തികൾ ക്ക്) പ്രതിദിനം 300 രൂപ നിരക്കിൽ ഏഴു ഏഴു ദിവസത്തേക്ക് ആകെ 9,91,200 രൂപയും അനു വദിച്ചിട്ടുണ്ട്.
മൈസൂരുവില് ബസും ലോറിയും കൂട്ടിയിടിച്ചു; മൂന്നു മലയാളികള് അടക്കം നാലു മരണം
മൈസൂരു: കര്ണാടകയിലെ മൈസൂരുനടുത്ത് ബസും ലോറിയും കൂട്ടിയിടിച്ച് മൂന്നു മലയാളികള് അടക്കം നാലുപേര് മരിച്ചു. ബംഗളൂരുവില് നിന്നും കോഴിക്കോട്ടേക്ക് വരികയായിരുന്ന സ്ലീപ്പര് ബസാണ് അപകടത്തില് പെട്ടത്. മൈസൂരുവിന് സമീപത്തെ പെരിയപട്ടണത്താണ് അപകടം. പുലര്ച്ചെ 3.45 ഓടെയാണ് അപകടം ഉണ്ടായത്.ബസ് ഡ്രൈവര് മൈസൂരു സ്വദേശി സുനില്, ബസ് ക്ലീനര് മലയാളി സുഹൈല്, കോഴിക്കോട് മാങ്കാവ് സ്വദേശി സജേഷ്, ബേപ്പൂര് സ്വദേശി അഫ്താബ് എന്നിവരാണ് മരിച്ചത്. നാലു പേരുടെയും മൃതദേഹം പെരിയപട്ടണയിലെ ആശുപത്രിയിലാണ്. ഇതില് എട്ടു പേരുടെ പരിക്ക് സാരമുള്ളതാണെന്നാണ് റിപ്പോര്ട്ട്.ബസില് 30 ഓളം പേരാണ് ഉണ്ടായിരുന്നത്. പരിക്കേറ്റ 15 ഓളം പേരെ പെരിയപ്ട്ടണയിലെയും മൈസൂരുവിലെയും ആശുപത്രികളില് പ്രവേശിപ്പിച്ചു.
കോഴിക്കോട് നഗരത്തിൽ ഇന്ന് ഉച്ചയ്ക്ക് ശേഷം വിദ്യാഭ്യാസ സ്ഥാപനങ്ങൾക്ക് അവധി; കേസരി ഭവനിൽ നിയന്ത്രണം.
കോഴിക്കോട്: ഉപരാഷ്ട്രപതിയുടെ സന്ദർശനത്തോടനുബന്ധിച്ച് കോഴിക്കോട് നഗരത്തിൽ കർശന സുരക്ഷാ ക്രമീകരണങ്ങളും ഗതാഗത നിയന്ത്രണങ്ങളും ഏർപ്പെടുത്തുന്നതിനാൽ, ഇന്ന് (ഒക്ടോബർ 16) ഉച്ചയ്ക്ക് ശേഷം കോഴിക്കോട് കോർപ്പറേഷൻ പരിധിയിലെ വിദ്യാഭ്യാസ സ്ഥാപനങ്ങൾക്ക് ജില്ലാ കളക്ടർ അവധി പ്രഖ്യാപിച്ചു.കോർപ്പറേഷൻ പരിധിയിലുള്ള അങ്കണവാടികൾ, മദ്രസകൾ, സിബിഎസ്ഇ, ഐസിഎസ്ഇ സ്കൂളുകൾ, പ്രൊഫഷണൽ കോളേജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും അവധി ബാധകമായിരിക്കും. എന്നാൽ മുൻകൂട്ടി നിശ്ചയിച്ച പൊതുപരീക്ഷകൾക്കും യൂണിവേഴ്സിറ്റി പരീക്ഷകൾക്കും അവധി ബാധകമല്ല.കൂടാതെ, ചാലപ്പുറം കേസരി ഭവൻ കെട്ടിടത്തിൽ പ്രവർത്തിക്കുന്ന എല്ലാ വാണിജ്യ-വാണിജ്യേതര സ്ഥാപനങ്ങളുടെയും പ്രവർത്തനങ്ങൾക്ക് ജില്ലാ കളക്ടർ നിയന്ത്രണം ഏർപ്പെടുത്തിയിട്ടുണ്ട്. ഇന്ന് ഉച്ചയ്ക്ക് ഒരു മണി മുതൽ കെട്ടിടത്തിലേക്കുള്ള പൊതുജന പ്രവേശനം പൂർണ്ണമായും നിരോധിച്ചു. ബാങ്ക് ഓഫ് ബറോഡയുടെ ചാലപ്പുറം ശാഖ ഉൾപ്പെടെ കെട്ടിടത്തിലെ എല്ലാ സ്ഥാപനങ്ങളും ഓഫീസുകളും ഉച്ചയ്ക്ക് ഒരു മണിക്ക് ശേഷം അടച്ചിടണമെന്ന് ജില്ലാ കളക്ടർ അറിയിച്ചു.
നവരാത്രി ആഘോഷങ്ങൾക്കായി തമിഴ്നാട് മുഖ്യമന്ത്രി വിജയ് കേരളത്തിൽ; നാളെ തൃശൂരിൽ എത്തും
തൃശൂർ: നവരാത്രി ആഘോഷങ്ങൾക്കായി തമിഴ്നാട് മുഖ്യമന്ത്രി സി ജോസഫ് വിജയ് നാളെ കേരളത്തിൽ എത്തും. തൃശ്ശൂരിൽ കല്യാൺ ജ്വല്ലേഴ്സ് ഉടമ ടി എസ് കല്യാണരാമൻറെ വസതിയിൽ ആഘോഷങ്ങളിൽ പങ്കെടുക്കും. കല്യാൺ ഗ്രൂപ്പ്സ് വിപുലമായ നവരാത്രി ആഘോഷങ്ങൾക്ക് തയ്യാറെടുക്കുന്നു. മുൻവർഷങ്ങളിൽ അമിതാഭ് ബച്ചൻ ഉൾപ്പെടെയുള്ള നിരവധി പ്രമുഖർ കല്യാൺ ഗ്രൂപ്പിന്റെ ആഘോഷങ്ങളിൽ പങ്കെടുത്തിരുന്നുകോയമ്പത്തൂരിലെ ഗാന്ധിപുരത്ത് സജ്ജീകരിച്ചിരിക്കുന്ന ‘പെരിയാർ അറിവുലകം’ ലൈബ്രറിയുടെ ഉദ്ഘാടനം നാളെ (ഒക്ടോബർ 16) തമിഴ്നാട് മുഖ്യമന്ത്രി വിജയ് നിർവഹിക്കും. തുടർന്ന് കോയമ്പത്തൂരിലെ പരിപാടികൾ പൂർത്തിയാക്കിയ ശേഷം അദ്ദേഹം അവിടെ നിന്ന് ഹെലികോപ്റ്ററിൽ കേരളത്തിലേക്ക് എത്തുമെന്നാണ് റിപ്പോർട്ട്. തൃശ്ശൂരിലെ ഗുരുവായൂർ ക്ഷേത്രം സന്ദർശിക്കാനും അദ്ദേഹം പദ്ധതിയിടുന്നുണ്ടെന്നും റിപ്പോർട്ടുണ്ട്.
മഴ കനക്കുന്നു: ഇന്ന് അതിശക്തമായ മഴയ്ക്ക് സാധ്യത, നാല് ജില്ലകളില് ഓറഞ്ച് അലേര്ട്ട്
തിരുവനന്തപുരം: തുലാവര്ഷം എത്തിയതോടെ സംസ്ഥാനത്ത് മഴ കനക്കുന്നു. ഇന്നും നാളെയും 14 ജില്ലകളില് കാലാവസ്ഥ നിരീക്ഷണ വകുപ്പ് മഴ മുന്നറിയിപ്പ് പ്രഖ്യാപിച്ചിരിക്കുകയാണ്. ഇന്ന് അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. അതേസമയം തുലാവര്ഷം ആരംഭിച്ചതായി ഇന്ന് ഉച്ചയോടെ കാലാവസ്ഥ വകുപ്പ് ഔദ്യോഗികമായി പ്രഖ്യാപിച്ചു. പത്തനംതിട്ട, കോട്ടയം, ഇടുക്കി, എറണാകുളം ജില്ലകളില് ഇന്ന് ഓറഞ്ച് അലേര്ട്ട് പ്രഖ്യാപിച്ചിട്ടുണ്ട്. മറ്റ് 10 ജില്ലകളിലും ഇന്ന് യെല്ലോ അലേര്ട്ടാണ്. നാളെ മുഴുവന് ജില്ലകളിലും യെല്ലോ അലേര്ട്ട് പ്രഖ്യാപിച്ചിട്ടുണ്ട്. മറ്റന്നാള് മുതല് ഒറ്റപ്പെട്ടയിടങ്ങളില് ശക്തമായ മഴ തുടരും. കാലവര്ഷം രാജ്യത്തുനിന്ന് പൂര്ണമായി പിന്വാങ്ങിയതിന് പിന്നാലെ കേരളത്തിന് പുറമേ തമിഴ്നാട്, പുതുച്ചേരി, കാരയ്ക്കല്, മാഹി എന്നിവിടങ്ങളില് വടക്കുകിഴക്കന് മണ്സൂണ് മഴയ്ക്ക് തുടക്കമായി.ഡിസംബര് വരെയും തുലാവര്ഷം തുടരും. വടക്കന് കാറ്റ് ശക്തമായി വീശുന്ന സാഹചര്യത്തിലാണ് തുലാവര്ഷം പ്രഖ്യാപിച്ചിരിക്കുന്നത്. വരും ദിവസങ്ങളില് ശക്തമായ മഴയാകും ഉണ്ടാകുക. വൈകുന്നേരത്തോടെ ഇടിയോട് കൂടിയ മഴയാകും ഉണ്ടാകുകയെന്നും എല്ലാവരും ജാഗ്രത പാലിക്കണമെന്നും മുന്നറിയിപ്പുണ്ട്.നാല്പത് മുതല് അമ്പത് കിലോമീറ്റര് വേഗതയില് ശക്തമായ കാറ്റും പ്രവചിച്ചിട്ടുണ്ട്. വടക്കന് കേരളത്തെ അപേക്ഷിച്ച് തെക്കന് ജില്ലകളില് ശക്തമായ മഴ ലഭിക്കാനുള്ള സാധ്യതയാണ് പ്രവചിച്ചിരിക്കുന്നത്. വിവിധ ജില്ലകളില് ജാഗ്രതാ നിര്ദേശം പുറപ്പെടുവിച്ചിട്ടുണ്ട്. മലയോര മേഖലകളിലും തീരപ്രദേശങ്ങളിലുമുള്ളവര് ജാഗ്രത പാലിക്കണമെന്നും നിര്ദേശമുണ്ട്. ഓറഞ്ച് അലേര്ട്ട് പ്രഖ്യാപിച്ചിരിക്കുന്ന ജില്ലകളില് 24 മണിക്കൂറില് 115.6 മില്ലിമീറ്റര് മുതല് 204.4 മില്ലിമീറ്റര് വരെ അതിശക്തമായ മഴ ലഭിക്കുമെന്നാണ് പ്രവചനം.
ഉദ്യോഗസ്ഥരുടെ അലംഭാവം; മലപ്പുറത്ത് കിഫ്ബി പദ്ധതികളില് കൂടുതലും കടലാസില്
മലപ്പുറം: മലപ്പുറത്ത് കിഫ്ബിയുടെ 28 പദ്ധതിയില് കൂടുതലും കടലാസില് തന്നെയെന്ന് റിപ്പോര്ട്ട്. കിഫ്ബി വഴി വിവിധ വകുപ്പുകളിലായി ജില്ലയില് അനുവദിച്ച പദ്ധതികളാണ് ഇപ്പോഴും പൂര്ത്തിയാകാതെ കിടക്കുന്നത്. 28 പദ്ധതികളില് ടെന്ഡര് നടപടികള് പൂര്ത്തിയായവയും നിര്മ്മാണ അനുമതി നല്കിയവയുമെല്ലാം ഉള്പ്പെടുന്നുണ്ട്. പ്രാരംഭ നടപടികള് ആരംഭിക്കാത്ത പദ്ധതികളും കൂട്ടത്തില് ഉണ്ടെന്നാണ് വിവരം. ഉദ്യോഗസ്ഥരുടെ അലംഭാവവും കൃത്യമായ തുടര് നടപടികള് ഇല്ലാത്തതുമാണ് പദ്ധതികള് വൈകാന് കാരണമെന്നാണ് ആക്ഷേപം. നാല് ഘട്ടമായാണ് പദ്ധതികളുടെ പ്രവര്ത്തനങ്ങള് നടക്കുന്നത്.
വിദ്യാഭ്യസ വകുപ്പ്, ഉന്നത വിദ്യാഭ്യാസ, കായിക വകുപ്പ്, തദ്ദേശ വകുപ്പ് തുടങ്ങിയ വകുകളുടെ പദ്ധതികള് ഇതില് ഉള്പ്പെടുന്നുണ്ട്. സ്കൂളുകള് സ്റ്റേഡിയങ്ങള് എന്നിവയുടെ നിര്മാണം റോഡുകളുടെ നിര്മാണവും നവീകരണവും എന്നിവ കടലാസിലൊതുങ്ങിയ പദ്ധതികളായി ഉണ്ട് എന്നാണ് വിവരം. ഫണ്ട് അനുവദിക്കപ്പെട്ടിട്ടും എന്തുകൊണ്ട് പദ്ധതികളില് തുടര് നടപടികള് ഉണ്ടാകുന്നില്ലെന്നാണ് ഉയരുന്ന ചോദ്യം. 400 മീറ്റര് മത്സരം നടത്താനാകുമായിരുന്ന സ്റ്റേഡിയത്തില് കിഫ്ബിയുടെ നിര്മാണങ്ങള്ക്ക് ശേഷം അത് കഴിയാത്ത അവസ്ഥയും മലപ്പുറത്ത് വന്നിരുന്നു. കൂടാതെ അതിന് അടുത്ത് പണിതിരുന്ന സിമ്മിംഗ് പൂള് പല തവണ ഉദ്ഘാടനം ചെയ്തെങ്കിലും കായിക താരങ്ങള്ക്ക് ഇപ്പോഴും തുറന്ന് കൊടുക്കാന് ആയിട്ടില്ല. ഇത്തരം അശാസ്ത്രീയതയും പദ്ധതികളില് നിലനില്ക്കുന്നു. കിഫ്ബി പുനക്രമീകരണത്തിന് പിന്നാലെ പദ്ധതികളുടെ ഫണ്ട് ലാപ്സ് ആകുമോ എന്ന ആശങ്കയും നിലനില്ക്കുന്നുണ്ട്.അതേസമയം കിഫ്ബി വിദഗ്ധസമിതി റിപ്പോര്ട്ട് ഇന്ന് നിയമസഭയില് സമര്പ്പിക്കും. കിഫ്ബി സര്ക്കാരിന് വന് ബാധ്യത എന്നാണ് വിദഗ്ധ സമിതി റിപ്പോര്ട്ടിലുള്ളത്. കിഫ്ബിക്ക് കുച്ചുവിലങ്ങിടാനാണ് സര്ക്കാര് നീക്കം. കിഫ്ബി വഴിയുള്ള കടമെടുപ്പ് അവസാനിപ്പിക്കാന് തീരുമാനം. ജീവനക്കാരുടെ എണ്ണം കൂടുതലാണെന്നും വിദഗ്ധസമിതി കണ്ടെത്തിയിട്ടുണ്ട്. കിഫ്ബിയിലെ ജീവനക്കാരെ പുനര്വ്യന്യസിക്കാനും ശുപാര്ശ ചെയ്യുന്നുണ്ട്. കിഫ്ബി പൂര്ത്തിയാകാത്ത പദ്ധതികളും അന്വേഷിക്കാനാണ് സര്ക്കാര് നീക്കം. വിദഗ്ധസമിതി റിപ്പോര്ട്ട് മുഖ്യമന്ത്രി മേശപ്പുറത്ത് വെയ്ക്കും. വിദഗ്ധസമിതി റിപ്പോര്ട്ടില് വാര്ത്താസമ്മേളനം നടത്താനാണ് മുഖ്യമന്ത്രിയുടെ നീക്കം.



