കോഴിക്കോട്: സെപ്റ്റംബർ 17 മുതൽ 30 വരെ ട്രെയിൻ സർവീസുകൾക്ക് നിയന്ത്രണം ഏർപ്പെടുത്തുന്ന സാഹചര്യത്തിൽ മലബാർ മേഖലയിലെ യാത്രക്കാരുടെ ബുദ്ധിമുട്ടുകൾ പരിഹരിക്കുന്നതിന് കോഴിക്കോട്, കണ്ണൂർ, കാസർകോട് ജില്ലകളിലെ പ്രധാന റൂട്ടുകളിൽ അധിക സർവീസുകൾ കെഎസ്ആർടിസി ആരംഭിക്കണമെന്ന് മനുഷ്യാവകാശ കമ്മീഷൻ.റദ്ദാക്കപ്പെടുന്ന ട്രെയിൻ സർവീസുകളുടെ വിവരങ്ങൾ മുൻകൂട്ടി മനസിലാക്കി യാത്രക്കാരുടെ തിരക്ക് അനുഭവപ്പെടുന്ന സ്ഥലങ്ങളിൽ അധിക സർവീസുകൾ ഏർപ്പെടുത്തണമെന്നാണ് ജുഡീഷ്യൽ അംഗം കെ. ബൈജുനാഥ് കെ.എസ്.ആർ.ടി.സി മാനേജിംഗ് ഡയറക്ടർക്ക് നൽകിയ നിർദ്ദേശം. ഉത്തരവിന്റെ അടിസ്ഥാനത്തിൽ സ്വീകരിച്ച നടപടികൾ കെ.എസ്.ആർ.ടി.സി എം.ഡി 15 ദിവസത്തിനകം കമ്മീഷനെ അറിയിക്കണം. അടുത്തമാസം കോഴിക്കോട് നടക്കുന്ന സിറ്റിംഗിൽ കേസ് പരിഗണിക്കും.ട്രെയിൻ സർവീസുകൾക്ക് താൽക്കാലിക നിയന്ത്രണം ഏർപ്പെടുത്തുന്നത് കോഴിക്കോട്, കണ്ണൂർ, കാസർകോട് ജില്ലകളിലെ ട്രെയിൻ യാത്രക്കാരെ പ്രതികൂലമായി ബാധിക്കുമെന്ന് ഉത്തരവിൽ പറഞ്ഞു. ഇത്തരം സാഹചര്യത്തിൽ യാത്രാ പ്രതിസന്ധി ലഘൂകരിക്കുന്നതിനായി പൊതുഗതാഗത സംവിധാനങ്ങൾ ഫലപ്രദമായി വിന്യസിക്കണമെന്ന് കെ. ബൈജുനാഥ് ഉത്തരവിൽ പറഞ്ഞു. കോൺഫെഡറേഷൻ ഓഫ് ഓൾ ഇന്ത്യ റയിൽ യൂസേഴ്സ് അസോസിയേഷൻ വർക്കിംഗ് ചെയർമാൻ ഷെവലിയർ സി.ഇ. ചാക്കുണ്ണി സമർപ്പിച്ച പരാതിയിലാണ് നടപടി.

കോഴിക്കോട് : നാലു വയസ്സുകാരനോട് ലൈംഗികാതിക്രമം നടത്തിയ കേസിൽ നോർത്ത് ബേപ്പൂർ സ്വദേശി മുണ്ടോടി വീട്ടിൽ പയസിനെ(43) ഫാസ്റ്റ്ട്രാക്ക് സ്പെഷൽ കോടതി ജഡ്ജി സി.എസ്.അമ്പിളി 5 വർഷത്തെ കഠിന തടവിനും 40,000 രൂപ പിഴ അടയ്ക്കാനും ശിക്ഷിച്ചു. മാറാട് പൊലീസ് സ്റ്റേഷൻ പരിധിയിൽ 2024 ലാണ് കേസിനാസ്പദമായ സംഭവം നടന്നത്. മകന്റെ കൂടെ കളിക്കുകയായിരുന്ന ആൺകുട്ടിയോട് ലൈംഗിക അതിക്രമം നടത്തിയതെന്നാണ് കേസ്. മാറാട് എസ്ഐ എൽ.വി.അരുൺ കുമാറിന്റെ നേതൃത്വത്തിലാണ് അന്വേഷണം നടന്നത്. പ്രോസിക്യൂഷനു വേണ്ടി അഡ്വ. ആർ.എൻ.രഞ്ജിത്ത് ഹാജരായി.

കോഴിക്കോട് : ജില്ലയിൽ ചൂട് കനത്തതോടെ കത്തുന്ന വെയിലിൽ ജോലി ചെയ്യാനാവാതെ തൊഴിലാളികൾ ദുരിതത്തിൽ. രാവിലെ മുതൽ ആരംഭിക്കുന്ന കടുത്ത വെയിൽ വൈകിട്ട് വരെ നീളുന്നത് സാധാരണക്കാരുടെ അദ്ധ്വാനത്തെയും ആരോഗ്യത്തെയും സാരമായി ബാധിക്കുന്നു.നിർമ്മാണ തൊഴിലാളികൾ, ചുമട്ടുതൊഴിലാളികൾ, ട്രാഫിക് പൊലീസുകാർ, ഓൺലൈൻ ഡെലിവറി ജീവനക്കാർ, കർഷകർ, ഉന്തുവണ്ടിയിൽ സാധനം വിൽക്കുന്നവർ തുടങ്ങി തുറസ്സായ സ്ഥലങ്ങളിൽ ജോലി ചെയ്യുന്ന വിഭാഗങ്ങളാണ് വലിയ വെല്ലുവിളി നേരിടുന്നത്. അന്തരീക്ഷം കൂടുതൽ തെളിഞ്ഞ് സുഖകരമായ കാലാവസ്ഥ അനുഭവപ്പെടേണ്ട സെപ്തംബറിലാണ് ഇവർ ചൂടിൽ വലയുന്നത്.മഴയുടെ കുറവും കാലാവസ്ഥാ വ്യതിയാനവും മൂലം അനുഭവപ്പെടുന്ന അപ്രതീക്ഷിത വെയിലായതിനാൽ സാധാരണ വേനൽക്കാലത്തോ കനത്ത മഴക്കാലത്തോ ലഭിക്കാറുള്ള അധിക വേതനം ഫുഡ് ഡെലിവറി ജീവനക്കാർക്കിപ്പോൾ ലഭിക്കുന്നില്ല.ചൂട് ഉയർന്നിട്ടും ട്രാഫിക് പൊലീസുകാർക്ക് ജോലി സമയത്തിലോ ക്രമീകരണങ്ങളിലോ പ്രത്യേക ഇളവുകളൊന്നും അനുവദിച്ചിട്ടില്ല. തൊഴിലിടങ്ങളിൽ ആവശ്യത്തിന് ശുദ്ധജലം ലഭ്യമല്ലാത്തത് നിർമ്മാണ തൊഴിലാളികളെ കടുത്ത നിർജ്ജലീകരണത്തിലേക്ക് നയിക്കുന്നുണ്ട്.

കോഴിക്കോട്: സ്വകാര്യ ബസ് സർവീസുകളുടെ സമയം കൃത്യമായി ക്രമീകരിക്കാത്തതിനാൽ മത്സരയോട്ടം പതിവായി. സമയത്തെ ചൊല്ലിയുള്ള ബസ് ജീവനക്കാരുടെ തർക്കങ്ങളും സംഘട്ടനങ്ങളും തുടരുകയാണ്. കാൽനടക്കാർക്ക് റോഡരികിലൂടെ സ്വസ്ഥമായി നടന്നുപോകാനാവാത്ത സ്ഥിതിയാണ്. സിഗ്നൽ ജംഗ്ഷനുകളിൽ പോലും ലക്കും ലഗാനുമില്ലാതെയാണ് ബസുകളുടെ മത്സരയോട്ടം. ഇതേത്തുടർന്ന് ഇരുചക്രവാഹനങ്ങൾക്കാണ് ഏറെ ഭീഷണി. സീബ്രാലെെനിലൂടെ കടന്നുപോകാൻ വരെ കാൽനടക്കാർക്ക് കാത്തു നിൽക്കണം. സ്വകാര്യ ബസുകളുടെ ട്രാഫിക് നിയമലംഘനങ്ങളും പതിവാണ്. ഇവ നിയന്ത്രിക്കാൻ അധികൃതരും ഒന്നും ചെയ്യുന്നില്ല.മിനിറ്റുകളുടെ ഇടവേളയിൽ സ്വകാര്യബസുകൾക്ക് പെർമിറ്റ് അനുവദിക്കുന്നതാണ് പ്രശ്നം. നിശ്ചിത സമയത്ത് ഓടിയെത്താനും കൂടുതൽ യാത്രക്കാരെ കിട്ടാനുമാണ് പരക്കംപാച്ചിൽ. ബേപ്പൂർ-മെഡിക്കൽ കോളേജ് റൂട്ടിലോടുന്ന സ്വകാര്യ ബസുകാർ കഴിഞ്ഞ ദിവസം തമ്മിലടിച്ചിരുന്നു. കോഴിക്കോട്ടെ മാത്രം പ്രശ്മല്ല ഇത്. സംസ്ഥാനത്തെ പൊതുഗതാഗത ബസ് സർവീസുകളുടെ സമയക്രമം സംബന്ധിച്ച് പഠനം നടത്തി പുന:ക്രമീകരിക്കേണ്ട കാലം അതിക്രമിച്ചു.സമയക്രമം കാലാനുസൃതമായി പുന:പരിശോധിക്കണമെന്ന് മനുഷ്യാവകാശ കമ്മിഷൻ ഗതാഗത വകുപ്പ് സെക്രട്ടറിയോട് ആവശ്യപ്പെട്ടിരിക്കുകയാണ്.ഗതാഗതത്തിരക്ക്, റോഡുകളുടെ ശേഷി, യാത്രക്കാരുടെ ആവശ്യകത, നിലവിലുള്ള ബസ് സർവീസുകളുടെ എണ്ണം, റൂട്ടുകളുടെ ദൈർഘ്യം, വിവിധ സർവീസുകൾ തമ്മിലുള്ള ഇടവേള തുടങ്ങിയ ഘടകങ്ങൾ ശാസ്ത്രീയപഠനത്തിൽ ഉൾപ്പെടുത്തണമെന്നും ആവശ്യപ്പെട്ടു. സമയക്രമത്തെച്ചൊല്ലി സ്വകാര്യ ബസ് ജീവനക്കാർ തമ്മിലടിച്ച സംഭവത്തിന്റെ പശ്ചാത്തലത്തിലാണിത്. തമ്മിലടിക്ക് ശേഷം ജീവനക്കാർ തമ്മിൽ ഒത്തുതീർപ്പിലെത്തുന്നതു കാരണം പൊലീസിന് ഇക്കാര്യത്തിൽ ഫലപ്രദമായി ഇടപെടാനാവുന്നില്ല. നിലവിലുള്ള അശാസ്ത്രീയമായ സമയക്രമമാണ് തമ്മിലടിക്ക് കാരണമാകുന്നതെന്ന് ഉത്തരവിൽ പറഞ്ഞു. ജീവനക്കരുടെ പേരിൽ നടപടി എടുത്തതുകൊണ്ടു മാത്രം പ്രശ്നം പരിഹരിക്കപ്പെടില്ല.സമയക്രമത്തെ ചൊല്ലി ബസ് ജീവനക്കാർ തമ്മിൽത്തല്ലിയതിൽ കണ്ടക്ടറുടെയും ഡ്രൈവർമാരുടെയും ലൈസൻസ് ആറ് മാസത്തേക്ക് റദ്ദാക്കാൻ കോഴിക്കോ‌ട് ആർ.ടി.ഒ. ജെബി ഐ. ചെറിയാൻ ശുപാർശ നൽകി. ‘സരോജിനി’ ബസിന്റെ ഡ്രൈവർ പ്രബിൻ, കണ്ടക്ടർ വൈശാഖ്, ‘സെവൻ ഡെയ്സ്’ ബസിന്റെ ഡ്രൈവർ ഷാക്കിർ എന്നിവരുടെ ലൈസൻസാണ് റദ്ദാക്കുക. എടപ്പാളിലെ ഡ്രൈവർമാരുടെ പരിശീലന കേന്ദ്രത്തിൽ അഞ്ചുദിവസത്തെ നിർബന്ധിത ക്ലാസിനും ഹാജരാകണം. വ്യവസ്ഥകൾക്കെതിരായി സർവീസ് നടത്തിയതിന് ബസുടമകളുടെ പെർമിറ്റ് റദ്ദാക്കണമെന്നും ആർ.ടി.ഒ ശുപാർശ ചെയ്യും.